Statsministerip ammaalluni oqalugiaataa iluarisimaarpaat

Ministeriuneq Anders Fogh Rasmussen Folketingimi ammaanersiorluni ullumi oqalugiarpoq. Nunarsuarmi kiffaanngissuseq tamallu oqartussaaqataanerata pingaaruteqassusaa oqalugiarnermini pingaarnertut qulequtarai. Folketingimi ilaasortat Atlantikup avannaaneersut namminiilivinnissamik kissaateqartut tamanna tusarlugu nuannaarutigaat:

- Kiffaanngissuseqarusuttut namminersulerusuttullu tapersersortariaqarpavut. Kiffaanngissuseqarsinnaatitaanerput qanorlu inuuneqarusulluta toqqaasinnaatitaanerput illersortariaqarparput, ministeriuneq Anders Fogh Rasmussen Folketingip oqaluttarfianit ullumi taama oqarpoq.

Taamaattorli savalimmiormiut Folketingimi ilaasortaatitaat Høgni Hoydal ima oqarpoq:

- Inuiattut pisinnaatitaaffiigut danskit naalagaaffianni tusarniarneqarneq ajorput. Taamaalilluni kiffaanngissuseq pillugu ministeriunerup oqaasii naalagaaffeqartigiinnerup iluani atortinneqarneq ajorput Høgni Hoydal oqarpoq.

Lars-Emil Johansen tamatumunnga isumaqataavoq oqarluni:

- Ministeriunerup oqaatsini ilumoorussimappagit, kiffaanngissuseq inuiaallu pisinnaatitaaffiisa killilersorneqaratik pineqassappata namminersorneq pillugu ataatsimiititaliani sulinitsinni aaqqissuusseriaaseq sorleq atorlugu namminersulivikkusunnerluta toqqaaginnarsinnaalissaagut, Lars-Emil Johansen oqarpoq.

Namminersorneq pillugu isumalioqatigiissitat ministeriunerup ima oqaaseqarfigai:

- Namminersorneq pillugu isumalioqatigiisitat sulinerisa aappagu naammassinissaat qilanaaraarput, Anders Fogh Rasmussen oqarpoq.

Isumalioqatigiissitanilu siulittaasup Jonathan Motzfeldtip tamanna ima oqaaseqarfigaa:

- Akunnattoorutaasinnasut uniffiginagit sulinitta ingerlaqqinnissaa nalunaarutigimmagu nuannaarutigaara, Jonathan Motzfeldt taama oqarpoq.