Statoil politiinut nalunaarutigineqarpoq
Avatangiisit pillugit suliniaqatigiiffiup, Bellonap uliasioqatigiiffik Statoil politiinut suliassanngortippaa. Statoilip ajutoorneq Petruliumstilsynimut nalunaarutigisimanngikkaa, nittartagaq Petro.no allappoq.
Ruujorip simia mekaniskeq, ikkunniartillugu ajornartorsiortoqalermat ajutoorneq pivoq, tamannalu maajimi ukioq manna pilluni. Ruujori aserorpoq, qujanartumilli uuliamik maqisoqarani.
Taamaakkaluartoq Avatangiisinik illersuiniaqatigiiffik isumaqarpoq, annerusumik ajutoortoqarsimagaluarpat, Mexicomi ajutoornermut assersuunneqarsinnaasimagaluartoq.
Taamaattumik ajutoorneq Petroliumstilsynemut nalunaarutigineqarsimasariaqaraluartoq, Bellonakkormiut isumaqarput, taamaattumilluuna Statoil politiinut suliassanngortinneqartoq.
Uuliasiorneq eqqarsaatigalugu Norge isumannaallisaanernik pitsaanerpaamik atuutsitsivoq, piumasaqaatillu aamma Kalaallit Nunaanni atuuttuutinneqarlutik.
