Station Nordimi timmisartup orsussaanik benziinaarluerneq mingutsitserujussuanngilaq

Station Nordimi timmisartup orsussaanik benziinaarluertoqarmat mingutitserujussuartoqanngilaq, Kangilinnguani sakkutooqarfimmi stabschefi oqarpoq.

Kangilinnguani sakkutooqarfimmi sulisut Station Nordimi benziinaarluertoqarneranik sapaatip-akunnera kingulleq kalerrinneqarput. Qangali benziinaarluertoqarsimanersoq ilisimaneqanngilaq.

Station Nordimi benziinamik peqqumaateqarfimmik immiinialernermi timmisartup orsussaa benziina 11.400 literisut angitigisoq erngarsimasoq paasineqarpoq tamatumalu kingorna ruujori 150 meterisut takitigisoq kiffiusersorneqarpoq. Benziinalli erngarfia suli nassaarineqanngilaq.

Erngarneq taama angitigigaluartoq – tassa nappartat uuliaasiviit 70-t missaanni angitigisoq erngarsimagaluartoq – Kangilinnguani sakkutooqarfiup stabschefia, oberstløjtnant Ole Sparrevohn sunnguamilluunniit ernumassuteqanngilaq.

- Benziina erngartoq una ernumanarpallaanngilaq. Oqitsunnguuvoq akoqarpiaranilu taamaattumillu aalannguutiasuulluni. Akoqarnerusuuguni oqimaannerullunilu nunamut sitsiulluni mingutsitsinerussagaluarpoq, Ole Sparrevohn oqarpoq.

Benziinap nunamut sitsiunnissaralua nunap qeriuaannartup pinngitsoortittussaammagu aamma taassuma ernumanartoqannginnerarpaa.

- Mingutitsisoqarsimatillugu nunap ikiariissaarneri mingutitsisup nungunnissaata tungaanut piiartarpavut. Piiaanitsinnilu benziina aalannguulluni qangattartarpoq, Kangilinnguani sakkutooqarfiup stabschefia, oberstløjtnant Ole Sparrevohn naggasiivoq.

Erngarneq paasiniarlugu sakkutuut immikkut ittumik maskiinamik timmisartukkut tikisitsissapput.