Tamiilit Tiigeriisa pisortaat Velupillai Prabhakaran toqutaavoq, siuttueruppullu. Pikitsitseqatinilu naalakkersuisut sakkutuuinit nuunngajuttami unguneqaramik sapersipput.
- Tusakkat tutsuiginartut naapertorlugit pikitsitsisut siuttuat Vellupilai Prabhakaran napparsimasunik angallassissutinut ilaalluni qimaariaraluaq aallaarsaralugu toqunneqarpoq.
Prabhakaranip 1973-imi Tamiilit Tiigerii naalakkersuisunut akiuuttussanngorlugit pilersippai, siunertaralugu Tamiilit immikkut namminerisaminnik nunaqalersinnaaqqullugit.
Tamiilit Tigeriisa siuttuat 54-inik ukiulik naalakkersuisut tamaviaaqalutik 1983-imiilli persatalerilerpaat. Sapaatillu akunnerata naanerani Tamiilit Tiigerii nassuerput ajorsillutik. Tusakkat kingulliit naapertorlugit Prabhakaranip ernerata Charles Anthonyp angummi pissaanera kingornuttussaasimagaluarpaa; naalakkersuisulli sakkutuuilu akersuunnerminni aammattaaq ernera toqutaavoq. Maannakkorpiarlu ernerata timaata assinga Sri Lankami TVkkut takusassiarineqaqattaarpoq.
- Inuttut Sri Lankami Tamiilit siunissaat eqqasunnartoqartippara, Danmarkimi Tamiilit ataatsimooqatigiiffianni siulittaasoq Mahesh Ponambalam anersaaruluppoq.
- Maannakkorpiaq Danmarkimi Tamiilit tusintilippassuit aliasuupput. Neriuutigaat Sri Lankami eqqissisimasumik, akaareqatigiilernermillu aaqqiissoqarsinnaanera. Danmarkimi Tamiilit siuttuata nalunngikkaluarlugu siuttortik naalakkersuisut sakkutuuinit piorneqartoq, taamaattoq toqutaasimanera tupaallaatigisimaqaa.
- Veluppillai Prabhakaran nunarsuaq tamakkerlugu Tamiilit siuttoralugulu oqariartortoraat. Taamaammat toqutaanera alianarpoq, nikalluallannarlunilu, Danmarkimi Tamiilit siuttuat Mahesh Ponambalam nikallorsimaqisoq naggasiivoq.