Sri Lankami innuttaasut imminnut sorsuuteqqajaapput

Sri Lankami innuttaasut imminnut sorsuuteqqajaalerunarput.

Sorsukkumatuut De Tamilske Tigre ippassaq peqqarniisaarujussuarput, bussi qaartartumeerpaat, sakkutuullu 19-t tassani toqutaapput, Indiap imartaani qeqertami tassani piffissami nutaanerusumi aatsaat taama aattaqartigisumik saassussisoqarluni. Sakkutuut pikitsitsisullu katillugit 67-t inuunertik ippassaq annaavaat. Tamatumunnga akiniaallutik, pikitsitsisut Sri Lankami sakkutuunit silaannarmiit qaartartumeeriffigisaqattaarinikkut eqqorniarneqaqattaarput.

Tamilske Tiigerit naalakkersuisullu 2002-mi sakkuaakkunnaarput – sakkuaakkunnaarnerlu illuatungeriit arlaannaannilluunniit kipitinneqanngikkaluartoq, maanna ataqqalaarunarpoq.

Ikerasaliaq Maavilaru pikitsitsisut ullut qulit matuma siornatigut assersorpaat, sakkutuullu timmisartui tamaani ullaaq-manna seqernup nuinngitsiarnerani qaartartumeerisaqattaalerput. Naasorissaasut 50.000-init amerlanerit ikerasaliamiit imermik De Tamilske tiigerinit pissarsinaveersaartinneqarput. Tamanna pissutigalugu ikerasaliami qaartartumeerisaqattaarnerit ”inunnik ikiuiniarnertut” naalakkersuisut taagorpaat, naasorissaasummi tusindtilippassuit imermik pissaqarnissaat qulakkeerneqartariaqarmat.

Finlandip Danmarkillu Sri Lankami sakkuaattoqannginnissaanut nakkutilliisuutitatik tunuartinniarlugit tallimanngormat nalunaarutigereeraallu tamaani sakkuaattoqannginnera assut mianernarpoq.