Naalakkersuisut: Spritti Qaanaami nioqqutaaginnassaaq
Qaanaami innuttaasut ilaasa sprittip nioqqutaajunnaarnissaa kissaatigigaluaraat Naalakkersuisut Pilersuisup sprittinik imerpalasuunngitsunik nioqquteqarusulluni saaffiginnissuteqarsimanerigalua aasap ingerlanerani itigartissimavaat.
- Uani kiffartuussisussaatitaanermut isumaqatigiissut malipparput. Aamma suna tamaat qulangiinnarlugu allanngortiteruminaassinnaasartoq ilisimavarput. Kisianni innuttaasut kissaateqarannit taanna oqallinneq aallartinnikuuvoq. Taamaammallu Naalakkersuisut isummernikuupput ataatsimiisitsineq avannaani ingerlanneqartariaqartoq, naalakkersuisuni ilaasortaq, Jess Svane, ilaatigut KNI-p kiffartuussisussaatitaaneranut isumaqatigiissummut akisussaasuusoq, oqarpoq.
Peqqissutsimut naalakkersuisoqarfik ajornartorsiummut aamma ilisimaarinnippoq, taamaattumillu naalakkersuisoqarfik ilaatigut KNI-mut Avannaata Kommunianullu attaveqarsimavoq. Kisianni tassa Naalakkersuisut Qaanaami innuttaasunik aalajangiussaqannginnermini ataatsimeeqateqaqqaarusupput.
- Tassami kissaatigineqarpat taanna nalilersortariaqarpoq. Aamma atsiornernik nalunngilara nassiussaqartoqarnikuusoq. Taanna naalakkersuisoqarfimmi ataasiinnarmi inissimanngilaq. Kisianni aamma isumaginninnermut tunngasorujussuummata - peqqissutsimullu - aamma taanna apeqqut naalakkersuisoqarfimmi aamma allami inissisimavoq. Taamaammat uani aalajangerpugut ataatsimiisitsineq ingerlattariaqarparput, Jess Svane oqarpoq.
Naalakkersuisunit innuttaasunit ataatsimiisitsinissaq qaqagorpiaq pissanersoq suli oqaatigineqarsinnaanngilaq. Kisianni innuttaasut ataatsimiisinneqarnissaat, ilaatigut sprittip nioqqutigineqarneranut tunngasumik tusarniaaviusussaq, maanna pilersaarusiorneqaleruttorpoq.
- Pissutigalugu aamma spritti piniarianit atorneqartarpoq. Taava taarsissappat allamik assigusumik, taava suna ajornartorsiut taava takkutissua? Tunuaniittut arlallit soorunami innuttaasut peqatigalugit annertuumik eqqartorneqarusupput, Jess Svane oqarpoq.
Pilersuisumit KNR-imut siusinnerusukkut ilisimatitsissutigineqareernikuuvoq Qaanaami sprittip atugaanera nunap sinneranut sanilliullugu nalinginnaanngitsumik qaffasittoq. Qaanaamimi Pilersuisumi sprittip tunineqartarnera 2017-imiit 2018-imut 25 procentimik qaffariarsimavoq.
