Spejderit tammaarsuaaqqaarnerat ukiunik 100-nngortorsiorlugu, spejderit nunarsuarmi tamarmi 40.000-iusut ilaannanngui Tuluit Nunaanni ulluni makkunani tammaarsimaaleruttorput, tappavanilu nunatsinneersut spejderit 21-t peqataapput.
-Ajoraluartumilli nunatta erfalasua katinngat ullorsiornermi atorneqarsinnaasimanngilaq, Nunatsinni spejderit kattuffianni siulittaasoq Hans Kristian Lennert oqarpoq Nunarput Aasaaneranimi apersorneqarluni.
Kalaallit Nunaat immikkut naalagaaffiunngimmat katinngat atoqqusaasimanngilaq.
- Naalagaaffiunnginnattagooq Kalaallit Nunaat Savalimmiullu Danmarki naalagaaffeqatigimmassuk qallunaat erfalasuat atoqqusaavarput. Soorunami uggornarpoq erfalasutta atorsinnaannginnera, kisianni Browsea Islandimi kalaallinik peqataatitaqarneq assut nuannaarutigaarput, Hans Kristian Lennert oqarpoq.
- Akuerivaatigut taamatut peqataasinnaatilluta. Angerlaruttali suliniutigissavarput Kalaallit Nunaata Nunarsuarmi Spejderit Kattuffissuannut toqqaannartumik nunatut ilanngunnissaa, nunatsinni spejderit kattuffiata siulittaasua oqarpoq.
Spejderit Tuluit Nunaanni Brownsea Islandimi juulip ulluisa 28-aniit aggustip ulluisa arfineq-pingajuannut tammaarsimaarput.
