Føroya Bankimi pisortaaneq, Janus Petersen, oqarpoq, aningaaseriviup allilernissaa qangali pilersaarutigisimagitsik.
- Aningaaserivitsinnik Danmarkimi alliliinissarput pifissami sivisujaami eqqarsaatigisimavarput, aningaaseriviullu Sparbankip immikkoortortani ingerlalluaqisut arlallit tuniniarnialermagit taamaaliornissatsinnut periarfissarsivugut, Janus Petersen oqarpoq.
- Kalaallit Nunaat aningaaserivitsinnik allileriniarnitsinnut naleqqulluinnarpoq, tassami Kalaallit Nunaat Savalimmiullu inuussutissarsiornikkut qanimut suleqatigiittuarput, pisortaaneq nassuiaavoq.
Sparbankip immikkoortortai aqqaneq-marluk 30.000-it missaannik sullitaqarput, sulisullu katillugit 136-ullutik. Nutaarsiassaqartitsivimmi Ritzauimi tamanna allaaserineqarpoq.
Aningaaserivinnik tunisinermi Sparbank 356 millioni koruuninik isertitaqarpoq.