Spaniap avannarpasissuani inuppassuit akerliussutsimik takutitsipput
Spaniap avannarpasissuani inuit tusindtilippassuit sapaatip akunnerata naanerani akerliussutsimik takutitsipput, baskerit aviisianni ullormut saqqummersartumi, Egunkariami, tassa aviisimik isumalimmi, aviisiliortut tallimat eqqartuussaanerannut akerliullutik. Aviisiliortut taakku baskerit sakkutuuinut sorsukkumatuunut, kiffaanngissuseqalernissamik anguniagalinnut, tapersersuisuunerarneqarput.
decembarip 20-at 2009 16:55
Akerliussutsimik takutitsisut Baskerit Nunaanni illoqarfiit pingaarnersaanni, Bilbao-imi, akerliussutsimik takutitsipput, allagartarsuarnik tigummiarlutik, taakkunani allassimavoq: "Egunkaria kiffaanngissuseqalerli".
Aviisi Egunkaria politiit 2003-mi februaarimi matuaat, aviisip aaqqissuisua pisortallu sisamat tigusaralugit.
Eqqartuussineq Spaniami eqqartuussiviit qullersaanni sapaatip akunnerani uani aallartippoq.
Spaniami naalakkersuisut oqaatigisarpaat Egunkaria pikitsigajuunit ETA-kkunnit aningaasaliiffigineqarluni pilersinneqarsimasoq, ETA-llugooq suliffeqarfiutini sioorasaarilluni akilersuisitsinikkut aallarussisarikkullu aningaasaateqartikkaat, Spaniami politiit oqartarput.
Ritzau/AFP
