Spaniami saassussisoqarnerani ataaseq toqutaavoq
Spaniami inatsisartunik qinersisoqarnissaanut ullut marluinnanngortullu Spaniami nunap immikkoortuani avannarlermi illoqarfiup siulersuisuinut ilaasortaasimasoq ippassaq saassussisoqarnerani toqutaavoq.
Pisut sakkortugineqarmata qineqqusaarnerit piaarnerpaamik unikkallartinneqartut oqaatigineqarpoq.
Illoqarfiup siulersuisuinut ilaasortaasimasoq Isaías Carrasco 42-innarnik ukioqartoq illumi eqqaaniitsillugu tunuatigut arlalinnik aallaaneqarpoq.
Toqutaasorlu taanna socialistiusimanerarneqarpoq.
Qinersinerup naajartornerani pinerliiniartoqaratarsinnaanera Spaniami assut aarleqqutigineqarsimaqaaq.
Tassami 2004-mi kingullermik Spaniami inatsisartunut qinersisoqarmat qinersinissaq ullunik pingasunik sioqqullugu Madridimi sisamariarluni qaartartumeerisoqarpoq.
Taamanikkullu inuit 191-t toqutaapput 1800-illu ikilerneqarlutik.
