Spania aningaasarsiornikkut ajornartorsiorpoq

Naak Nunarput EU-mut ilaasortaanngikkaluartoq, nunat EU-mut ilaasortat aningaasarsiornikkut ajornartorsiornerat aamma Nunatsinnut sunniuteqarsinnaavoq.

Spania EU-mi nunat aningaasarsiornermik ingerlatsisut annerpaat sisamaraat, nunamilu tassani aningaasatigut ajornartorsiorneq annerulissappat, aningaasarsiornermik ilisimasallit Europamiut aningaasaanut Euromut sunniuteqarnerlussangatippaat.

Qallunaat koruuniata, aamma Nunatsinni atorneqartup, Euromut attuumassuteqarluinnaqqissaarnera pissutigalugu, Euro nalikilleriassagaluarpat aamma tamanna Nunatsinnut sunniuteqarsinnaavoq. Tassami qallunaat koruuniat nalikilleriassagaluarpat nioqqutissat EU-p avataanit pisiarisartakkavut akisunerulissammata.

Taamaattorli Danmarkimit ataatsimoortumik tapiissutit Nunatsinni aningaasarsiornermut patajaallisaataammata, - tassa aalajangersimasumik isertitatut inissisimammata - nioqqutissallu Nunatta avataanit pisiarisartakkatta amerlanersaat Danmarkimeersuummata, Danmarkip nunanik EU-p avataaneersunik niueqateqarnera aatsaat allannguuteqarpat, tamanna Nunatta niuerneranik eqquisinnaassaaq.