Sorsuutit pillugit aaliangerneq isorineqartoq
Ministeriunerulli uparuaaneq qaangipallappallaaraa Inuit Ataqatigiit isumaqarput.
Folketingimi ammaanersiorluni oqallittoqarmat Johan Lund Olsenip, IA-meersup tusarliussaa ersarilluinnaraluarpoq, timmisartunik malersuutinik Irakimut sorsukkiartitsiniarluni Danmarkip qanittukkut aalajangerneranut:
Danmarkip taamatut Naalagaaffeqatigiit sinnerlugit aalajangernera, Savalimmiut Kalaallit Nunaaluunniit minnerpaamilluunniit oqaaseqaateqartinnissaat periarfissinnagit kukkuneruvoq. Kukkunerup Naalagaaffeqatigiinni pissutsit akornguserpai nunallu akornanni pissutsinik akorngusiisinnaalluni.
Aammattaaq Savalimmiormiu Sjudur Skaale ersarissumik oqaaseqarpoq:
- Danmark sorsungiarpat taava naalagaaffeqatigiit tamarmik sorsoqataassapput, Savalimmiut Kalaallit Nunaallu ilanngullutik. Avannaamiuusugulli aperineqarneq ajorpugut. Avannaamiut marluullutik eqqaasitsissutigaat uagut Inatsisartugut savalimmiormiullu Lagtingii 2003-mi qallunaat Irakimi sakkutuuliinissaannut akerliusimammata- taamanili maannakkulluunniit nunat taakku marluk isumaat aalajangiinnginnermi paasiniarneqarsimanngillat tusarniarneqarsimanatillu.
Kalaallit Nunaat Savalimmiullu ilisimatinneqartartut
Tamanna pillugu ministeriuneq Helle Thorning-Schmidt ima oqarpoq:
- Aalajangiitinnata ataatsimiititaliami oqallittoqartarpoq, Folketingip ataatsimiittarfiani oqallittoqarsinnaavoq, taamaalillutami Kalaallit Nunaanni Savalimmiunilu naalakkersuisut ilisimatittarpavut.
Tamannali Johan Lund Olsenimut naammanngilaq, ministeriunerup akissutaa naammagivallaanngilara taanna oqarpoq. Itillimi isumaqatigiissummik eqquutitsinngilaq taannami oqarpoq, Nunanut allanut sillimaniarnermullu tunngasunut Danmarkip Kalaallit Nunaat Savalimmiullu peqataatittassavai.
- Ima paasivara Itillimi isumaqatigiissummut 2003-meersumut akerliusoq, aammalu Namminersorneq eqqunnialeratsigu isumaqatigiissutinut akerliusoq. Taamani isumaqatigiittoqarpoq Danmark taama pingaaruteqartigisunik aalajangiissatillugu Inatsisartut tusarniarneqartassasut.
Johan Lund Olsenip savalimmiuneersullu Sjurdur Skaalep qallunaat naalakkersuisui sammisaq pillugu ukiamut attavigissamaarpaat.