Israelip avannamut kujammullu killeqarfiini akersuuttoqaraluartoq ulluinnarni inuuneq ingerlanneqarpoq.
- Inuuneq ingerlaannarpoq, Vibeke Lundgreen Israelip killeqarfiata eqqaani najugalik oqarpoq.
- Najugaqarfitsinniit 20 kilometerit missaani ungasissusilimmi israelimiut hizbollah-kkunnik qaartartumeeripput. Aneerasaartarfitsinniit ersiinnarpoq. Qaninnerpaamik qaartitsisoqarmat 500 meterit missaanni qaartoqarpaluppoq. Ullut tamarluinnaasa kilometerit tallimat qulillu akornanni qaarpaluttoqartarpoq, israelimiut najungaqarfianni meeqqat atuarfianni ilinniartitsisoq Vibeke Lundgreen oqaluttuarpoq nangillunilu:
- Najugaqarfipput bentonimik sanaajuvoq tamannalu pillugu najugaqarfitsinniiginnarsinnaavugut. Allaanngilaq paarnaarussatut inuuneqartugut. Pisariaqartuinnaat kiisa suliareqqusaalerput, soorlu nersussuarnik immuuiaaneq nerisassiornerlu. Inuuneq sapinngisaq malillugu ingerlanneqarniassammat meeqqat atuarfiat ammatinneqartarpoq. - Ammarneqaqqaarmallu sulinerput pissanganarsimaqaaq, qaarpaluttarnerilli sakkortusiartortillugit tigumanarsiartorsimavoq. Ippassaq ualikkut qaarpaluttarnerit qanippallaaqimmata qimaaffissianut meeqqallu qimaasariaqarsimavugut. Najugaqarfitsinni kalerrisaarutit atorunnaarsissimavagut meerartagut ersivallaannginniassammata, tamatuma kingunerisaanik mobil-igut atorlugit uatsinnut kalerrisaattarpugut, Vibeke Lundgreen naggasiivoq.