Sorsunneq akisoorsuaq
Irakimi sorsunneq amerikamiunut akisusimaqaaq, aamma sorsunnerup kingorna sanaartorneq akisoqaaq.
Aningaasanik atugassanik peqqissaarussinnginneq annerusumik tamatumunnga patsisaavoq. Aningaasammi tammaannartarput anngiortumik akiliilluni iluaqutissarsiorneq, suliniutinut nakkutilliinerlunneq peqquserlunnerlu patsisigalugit.
Bagdadimi illorsualiortoqarpoq irakimiut politiivisa ilinniarfissaannik, maannali atorneqarani napaannarpoq suli naammassineqannginnami. Inissisimanerata isumannaatsumiinnginnera aamma patsisaatinneqarpoq. Tassami inigisaminiittussaanngikkaluarpoq aamma qamussuarnik sorsuutinik nutaaliaalluinnartunik 20-nik pisinissaq naluttarfimmillu OL-imi atorneqartartut angeqataannik naluttarfilernissaa pilersaarutaanngikkaluarput. Tamakkua tamarmik 250 millioni koruuninik akeqarput.
Tamatumunnga patsisaavoq irakimiut oqartussaasui sanaartornermut akuliussimammata. Sanaartugassarlu maanna inissisimaffigisaanut isumannaatsuunngitsumut nuutsissimallugu amerikamiullu akuersiteqqaarnagit qamussuit sorsuutit naluttarfissarlu pisiarineqarsimammata.
Taanna Irakip piorsaqqinneqarnissaa pillugu nalunaarusiami nutaami 579-inik quppernilimmi ilaavoq. Assersuut alla tassaavoq suliffeqarfimmut aalajangersimasumut 200 millioni koruunit nalinginut pisiarineqarsimammata qamutit sorsuutit qaleruarsuallit, aaqanngitsut aqerlumit pitarneqarsinnaanngitsut attaveqaqatigiinnermullu atortorissaarutit, pisiarineqarsimasulli sumiinnersut ilisimaneqanngilaq.
Nutaarsiassaqartitsivimmi Associated Pressimi allaaserinnittoqarpoq nalunaarusiami nikalluallannartumik atuarneqarsinnaasut asuli atuilussinnarnerit, pakatsinerit peqquserlunnerillu, innuttaasut imminnut sorsuutingajassaaffianni atuuttut. Manna tikillugu amerikamiut akileraartartut 1700 milliard koruuninik akileeqataaffigisimasaanni.
Stewart Bone oqarpoq upperisarsioqatigiit imminnut sorsuunnerat ilungersunarnersaasoq, amerikamiullu milliardilikkaat isumannaallisaanermut atortagaat annikitsuinnarmik sunniuteqartut.
Irakip piorsaqqinneqarnissaa irakimiut namminneq isumaginiartussaavaat, tamannali suli piareersimaffiginngikkaat oqaatigineqarpoq.
Nalunaarusiami oqaatigineqarpoq irakimiut atorfillit akornanni peqquserlunneq atugaavallaartoq amerikamiullu suliniutit aallartitatik malinnaaffiginngippallaaraat.
