Sorsukkumatuutut ingasattajaarniartutullu nalilerneqarput

Perulluliorniat arfinillit Danmarkimi innuttaassuseqarput, tamarmilli nunanit allanit kingoqqisuullutik. Politiit Isertortumik Paasiniaasartuisa perulluliorniat sorsukkumatuutut ingasattajaarniartutullu nalilerpaat – taamatulli oqarneq naammanngilaq.:

-Nalunngilaat nunanut allanut attaveqarlutik, al-Qaedakkullu siuttuinut aamma attaveqarlutik.

Taama oqarpoq Politiit Isertortumik Paasiniaasartuini ittuusoq, Frank Jensen.

Politiit Isertortumik Paasiniaasartui aamma isumaqarput, Europap Kitaani aaqqissorluakkamik perulluliarniartoqarnerani siullerpaamik al-Qaedakkunnik attavilinnik naammattuuillutik.

Paragraf 114-ni naapertorlugu perulluliorniat pasillerpavut, paragraffilu taanna tassaavoq, peqqarniisaarniarneq – pikitsitsiniarnerluunniit.

Taamatut pasilliinitsinnut tunngavigaarput, paasisimagatsigik qaartartunik qaariaannarnik peqartut.

Taamaammallu tigusariniapallassimavavut, Frank Jensen oqarpoq.

Qaartartut qaariaannarnik taaneqartartut tassaapput,

anaarrunneqarlutik aammalu statisk elektricitetimik attorneqarnermikkut qaariaannaat.

Qaartartut qaariaannaat nassaarineqarput Københavnip Avannaa´tungaata Kitaani inissiarsuarni najugaqarfiusuni.

Qaartartunillu ilisimasalinnit katersorneqarneranni, inissiaqarfimmi eqqaanilu najugaqartut unnuaannarsuaq qimarnussuunneqartariqarsimapput.

Politiillu pinerliinianik tigusarinnittariaqarsimapput, qaartartut qaariaannaat inissiamiittut paasineqarmata.

Politiit Isertortumik Paasiniaasartui, uppernarsaatissanik ujaasillutillu, perulluliornianik tigusarinniortortariaqarsimapput, pinerluttorsiortunik, teknikerinik, qaartartunillu ilisimasalinnik ilalersorlutik. Tigusariortuinerat qaartartunillu qaariaannarnik arsaarsinerat adresseni assigiinngitsuni aqqanilinni ingerlanneqarsimapput. Arsaarinnissutinut aamma ilaasimapput qarasaasiat arlallit.

Inatsisinik atortitsinermik Damarkimi ministerip, Lene Espersenip perulluliornianik tigusarinninnerit isumakulunnartoqartippai. Erseqqissaatigaali, Danmarkimi isumannaallisaanissamik upalungaarsimanissat annertusineqartariaqanngitsut.