Soros 5 mia.kr.-inik suliniutinut tapiiumavoq

Amerikami pisuunersat ilaat George Soros silap pissusaata allanngoriartornerata kingunerisaanik aningaasaateqarfissarsuarmik 5 milliardi koruuninik imalerlugu pilersitsivoq.
Allattoq Najaaraq Egede
oktobarip 11-at 2009 13:34

Nunarsuarmi ilaatigut nunat tamalaat aningaasaannik niuernernit milliardærinngorsimasoq George Soros maanna 79-inik ukioqartoq Ungarnimiuuvoq USA-milu najugaqarluni.

- Uanga ekspertiunngilanga, innuttaasulli silap pissusaata allanngoriartorneranik ernummateqartut ilagiinnarpakka. Taamaammat aningaasaateqarfiliorpunga, George Soros DR-imit apersorneqarluni oqarpoq.

Aningaasaateqarfiliornera Københavnip rådhusiani ataatsimiinnermi ippassaq saqqummiunneqarpoq. Københavnimi silap pissusaa pillugu decembarimi ataatsimeersuarnissarsuaq sioqqullugu piareersarluni naapinneq nunat tamalaat aallartitaasa peqataaffigaat.

George Soros 24 milliardi koruuninik aningaasaateqarnerarneqarpoq, ilaatigut aningaasanik niuernikkut iluanaarutigisimasaminik.

- Teknologi avatangiisinik mingutsitsinngitsunik ineriartortitsiviusoq Greentec, tapersersorakku qinnuteqarfigineqarsinnaasumik aningaasaateqarfiliorpunga. Soorunami aningaasanik iluanaaruteqassallunga aamma naatsorsuutigaara, taamaammat suliniutit ajornartorsiutinik qaangiinissamut qulakkeerisussat tapersersorneqartarumaarput, Soros nassuiaavoq.

George Soros San Franciscomi silap pissusaa pillugu ilisimatusarfimmik aamma pilersitseqqammerpoq. Ilisimatusarfik nunarsuarmi inatsisinik silap pissusaanut tunngasunik atuunnerinillu nakkutilliiffiussaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq