Sorlak nutaamik siulittaasortaarpoq

Sorlammi siulittaasuusimasup Kaalinnguaq Siegstadip oqaatsit pillugit isumai Sorlammi siulersuisunit akueriuminaatsinneqareersut Sorlaallu isigineqarneranut innarliisinnaasutut nalilerneqareersut siulittaasutut inissisimaffimminiit peersinneqarpoq. Ataatsimeersuartitsinissap tungaanut Sorlammi utaqqiisaasumik siulittaasutut Aili Liimakka Laue inissinneqarluni.

Sorlak Aasianni ataatsimeersuartitsereersoq kattuffik nutaamik siulittaasortaarpoq siulersuisullu nutaat ivertinneqarput. 

Sorlammi siulittaasunngortoq Atassutip Inuusuttaaninngaaneersoq Paninguak´Mathiassen Kruse, siulittaasup tulliatut qinigaavoq Siumup Inuusuttunut Suleqatigiiffiisa Kattuffianeersoq  Piitannguaq Møller. 

Sorlammi siulersuisunut ilaasortat nutaat toqqarneqarnerisa saniatigut aamma eqqartueqatigiinnikkut siunissami suliassat assigiinngitsut ataatsimeersuarnermi oqallisigineqarput. Ukioq manna ataatsimeersuarneq qulequtaqarpoq 'Qanilaassuseq Ataatsimoorfigaarput.'

Utoqqaat aamma qanimut suleqatigilernissaat anguniarlugu 'Kattuffik Utoqqaat Nipaat' suleqatigineqalerpoq.

- Danmarkimi kalaallit ilinniagaqartut kattuffiata ’Avalak’p Sorlaallu attaveqaqatigiinnerat suleqatigiinnerallu pilersinneqarpoq, Sorlammi siulittaasunngortoq Paninguak`Mathiassen Kruse ilisimatitsivoq.

Sorlak peqatigiiffinnik sisamanik nutaanik ilaasortartaarpoq, tassaallutik ’Kalaallit Nunaanni AFS’ aamma  ’Illorsuarni Inuusuttunut Peqatigiit.’ Allat ilaasortanngortut aamma tassaapput ’Inuusuttut Peqatigiit Narsarmijit’ aamma ’Aappilattumi Kalattoortartuaqqat Peqatigiiffiat’.  Sorlak inunnik 3.800 missaaniittunik ilaasortaqarpoq.

Sorlaap Aasianni ataatsimeersuarnera oktobarip 22-ianiit oktoberip 27-iata tungaanut ingerlanneqarpoq.