Sorlaat Partiiat pilersinneqarpoq
Partiip aallartinneqarnermini pilersitsisua, Nikoline Ziemer partiip siulittaasuatut qinerneqarpoq.
Partii nammineq nunarsuarmioqatigiinnermik pingaartitsisutut oqaatigaaq, naalakkersuinikkullu qiterpasissumi inissisimasuunerarluni.
Partiip siulittaasuata Nikoline Ziemerip partiip pilersinneqarnerani, nunatsinni partiit naalakkersuisoqatigiit akisussaassuseqanngitsumik aningaasarsiornermik ingerlatsinerarpai, partiillu aningaasarsiornikkut ingerlatsineq uungaannaq isiginngitsoq ujartorpaa.
Nunatta namminersuleriartornissaa partiip qitiusumik pingaartitaatut oqaatigineqarpoq. Taamattaaq partii isumaqarpoq, Namminersornerullutik Oqartussat niuertuusaarunnaarlutik naalakkersuinermut tunngasut aallutissagaat. Tamannalu pissaaq Namminersornerullutik Oqartussat suliffeqarfiutaasa annerusumik namminersortinnerisigut.
Sorlaat Partiiat kommunimut qinersinermi Kangia-Kitaata kommunissaanut qinigassanngortitsiniarpoq.
Qineqqusaarnermi partiip qinigassanngortitaasa, tassa Nikoline Ziemerip Jan Hansenillu pingaarnerutillugit samminiarpaat meeqqat inuusuttullu, sumiiffinni oqartussaaqataaneq inuutissarsiornermilu atugassarititaasut.
