Soraarummersitsisarneq allaanerusoq siarummarneqassaaq
Webi atorlugu Niuernermik Ilinniarfimmi soraarummeersitsisarnernik misilittakkat aallaqqaamut tunngaviusumik ilinniarfinni atorneqalissapput, kingornalu ilinniartitsivinni allani nunarput tamakkerlugu sipaarutaaqisumik atorneqalersinnaassallutik.
Niuernermik Ilinniarfimmi misilittagaqarersut Sulisoqarnermut Inuussutissarsiutinullu Ilinniartitaanermut Pisortaqarfimmi immikkoortoqarfimmi aqutsisup Michael Christensen nassuiaateqarfigai.
Taamaallaat Nuummi Niernermik Ilinniarfimmi internetti atorlugu soraarummeersitsinernik misilittakkat misilittagaqarfigaavut. Allatut iliuusissaarulluta periuseq taanna kingullertut atorsimavarput taamannikkut ilinniartut ilai Niuernermik Ilinniarfimmut Nuummiittumut apuussinnaajunnaarmata, taamanikkullu isumassarsiarineqarsimavoq internetti atorlugu soraarummeerlutik misilitsissinnaanerat ingerlanneqarsinnaasoq, naak Danmarkimiikkaluartut.
- Michael Christensenilu aperineqarami
misilittakkatik qanoq atorniarneraat, akivoq;…
- Maannakkut aalajangiisoqarsimavoq, Niuernermik Ilinniarfiup internetti atorlugu ilinniartitsinerit arlaqartut ingerlassinnaagai. Maannakkut tunngaviusumik ilitsersuinermik ilinniartitsinerit internetikkut soraarummeernertai ingerlanneqarsinnaapput, taammaaliornikkut ilinniartut Nuummukartinngikkaluarlugit soraarummeersinneqarsinnaallutik. Maannakkullu ilinniakkat allat taamatut soraarummeersitsiviusinnaasunik imaqarsinnaasut allattorneqarput, tunngaviusumik ilinniarfinnit allanit atorneqalersinnaasut.
Radioaviisimiillu Michael Christensen, aperineqarami internetti atorlugu soraarummeersitsisarneq angalanernut ineqartitsinernullu qanoq sipaarniutaatigissinnaanera innersoq, akivoq.
- Soorlu taakku eqqaasakka, tunngaviusumik ilitsersuinermik ilinniartitsinernini,, soraarummeerniartillugit Nuummukartinneqartarneri ineqartitaasarnerilu annertoorujussuarmik sipaarfiusalissapput, internetti atorlugu soraarummeersinneqartalernerisigut, Sulisoqarnermut Inuussutissarsiutinullu Ilinniartitaanermut Pisortaqarfimmi immikkoortortaqarfimmi aqutsisuusoq, Michael Christensen naggasiilluni taama oqarpoq.
