Soraarninngornikut nunatsinnut suliartorusunnerusarput
- Nakorsat utoqqaanerusut pituttorsimanngillat, misilittagaallu Kalaallit Nunaanni pisariaqartinneqartarput, Eskild Boeskov Ilulissat napparsimavianni nakorsaaneq, atugassiami Ugeskriftet for Læger-mi apersorneqarluni oqarpoq.
- Soorunami nakorsat inuusunnerusut sulinerminni ingerlallualeruttortut Kalaallit Nunaanni sulilernissaat pitsaanerussagaluarpoq, taakkuali Kalaallit Nunaanni sulilersinniarnerat ajornakusoorpoq nakorsatut sulinerminni ilaquttaminnullu pittuttoqqanertik pissutigalugit, Eskild Boeskov oqarpoq.
Nakorsat inuusunnerusut ataavartumik sulisussat ujartornagit nakorsat paarlatsittut sulisussat peqqinnissaqarfimmit ujartorneqaannavipput.
Ujartuinermut atatillugu danskit nakorsat 26-t qanittukkut pikkorissartinneqarput, taaguuteqartumik "Den Grønlandske Patient" ilaatigut Kalaallit Nunaannut angalanermik ilaqartinneqartumik. Kalaallit Nunaanniinnerminni peqqinnissaqarfimmi paarlatitsut sulilernissamut periarfissat misissuataarpaat.
Nakorsanik pikkorissartitsineq aammalu Kalaallit Nunaannut angalatitsineq aappaagu aamma pissaaq.
Kalaallit Nunaanni Nakorsat peqatigiiffiat Grønlands Lægeforening napparsimavissuarmik Hvidovre Hospitalimik isumaqatigiissuteqarpoq, nakorsat Kalaallit Nunaanni sulisooreersut imaluunnit nakorsat Kalaallit Nunaanni sulilersussat Hvidovre Hospitalimi misilittagallip sulineranik malinnaanikkut ilinniartinneqartarnissaannik.
