Soraarnerussutisianut aningaasaateqarfiit nunatsinni aningaasaleerusupput
Aningaasaateqarfiiit pineqartut Nunatsinni aatsitassarsiornermut soqutiginninnerulernissaat pillugu, Naalakkersuisut siulittaasuat Kuupik V. Kleist oqaaseqareersorlu, aningaasaateqarfiit taakku soqutiginnilerput.
Soraarnerussutisianut aningaasaateqarfiit annersaata ilaat PKA, 200 milliardit koruunit sinnerlugit aningaasaatilik, aviisimut ullormut saqqummersartumut Politikenimut ullumi oqarpoq periarfissanik ujartuinialersoq.
Aningaasaateqarfik Nordea Liv & Pension aamma soqutiginnilersimavoq.
- Periarfissaalluarpoq. Taamaattumik pilersitsisoqarsinnaanissaa ammaffigaarput, ataatsimullu isigalugu soqutiginniffiginiarlutigu, aningaasaliiffissat pillugit Nordea Liv & Pensionimi pisortaq, Anders Schelde, Politkenimut oqarpoq.
Soraarnerussutisianut aningaasaateqarfiit allat Nunatsinni aatsitassarsiorsinnaanissamut aningaasaliissuteqarnissaminnut aamma soqutiginnipput, aningaasaliiffigineqarsinnaasut aarlerinanngippata aningaasaliiffigineqarsinnaanissaat ammaffigalugu.
Aatsitassarsiornermi periarfissat ataatsimut isigigaanni taava oqaatigineqartarpoq periarfissat quliugaangata ataaseq iluatsitsiffiusartoq, Politiken allappoq.