Soqutigisaqaqatigiit EU aquppaat
EU Parlamentimi inatsisiliortunut sunniiniartartut ullormut 20.000-t missingi sunniiniartuartarput. Danmarki sinnerlugu EU Parlamentimut ilaasortap SF-imeersup Margrethe Aukenip misigisimanerarluarpaa:
- Ornigutinnginnerminni sianerfigeqqaartarpaatigut. Pingaartumik oqaluuserisassanut pingaarutilinnut oqaaseqartartuulluni malunnarnerpaasarpoq. Uteriisertarput, inatsisassallu qanoq oqaasertaqarnissaat sunniuteqarfiginiartarlugit.
Aammattaaq Venstret sinnerlugit ilaasortap Annie Jensenip soqutigisaqaqatigiit sunniiniartarnerat misillerfigisarsimanerarpaa. Anorisaatinut inatsisiliornerniit puisit amiisa tunisaajunnaarnissaannut sunniiniartuartarnerarpai.
- Ataatsimiinnerit nalaanni sunniiniat, pingaartumik uumasunik illersuiniaqatigiit, ulapputtaqaat. Ullut ilaanni e-mailikkut allakkat 200t 300t missingi inatsisissanut allannguutissatut siunnersuutit uannut nassiunneqartarput, Annie Jensen oqarpoq.
Maja Kløjer Rasmussen, danskeq Tuluit Nunaanni ilisimatusartup pissuseq immikkut sammisaraa:
- Inatsisissanut allannguutissat nalunaarusiallu 80 procentiisa missingi soqutigisaqaqatigiit sunniiniarnerisigut allanngortinneqartarput.
EU Parlamentimi sunniiniartartut immikkut ilisimasalittut ikiuussinnaagaluartut, qinikkat tamat oqartussaanerannut akornusiisinnaapput:
- Sunniiniaqatigiit kimitsisarneri assigiinngittaqaat. Assersuutigisinnaavarput suliffissuaatillit sinnerlugit sunniiniartartut amerlanerupput kimitsisinnaanerusarlutillu. Suliniaqatigiiffiilli naalakkersuisunut attuumassuteqanngitsut NGOt, inuinnaat sinnerlugit suliniuteqartut, sunniisinnaanerat annikinneerarsuusarpoq. Taamaalilluni inuinnaat oqartussaaqataanerat equngasumik ingerlalersarluni, Maja Kløjer Rasmussen oqarpoq.