Sooruna KNR-ip aallakaatitassiat taakkuinnaat aallakaateqattaaginnarai?
KNR TV 1982-imi pilersinneqarmat KNR-ip DR-ip aallakaatitassiaanik KNR-ikkut aallakaatitsisarnissaa pillugu DR isumaqatigiissuteqarfigineqarpoq. Ullumikkut nuna tamakkerlugu digitalimik tv-kkut aallakaatitsinermut ikaarsaarnikuuvugut, kanalinillu akeqanngitsunik sisamanik aallakaatitsinissamut teknikkikkut periarfissaqarluta. Kalaallit Nunaat tamakkerlugu.
Namminersorlutik Oqartussat DR1 kanalikkut immikkoortukkut maanna neqeroorutigaat, KNR-ilu taamaalilluni nammineq immersugassaminik ’kalaallisuinnaq’ kanaliliorsinnaanngorpoq, peqatigisaanillu DR1-p aallakaatittagai aalajangiisuujunnaarlutik. Tamanna qangaaniilli kissaatigisupilussuusimavarput.
- Kanalili tamakkerlugu immersornissaanngikkallarparput, taamaammat kanalitut immikkut killilikkatut, aallakaatitakkat uteqqiatsillugit ingerlattariaqassavagut. Isiginnaartartutta piffissami naleqqussorisaminni aallakaatittakkatsinnik isiginnaarsinnaanissaat anguniarlugu taamaaliorpugut, KNR-TV-mi aallakaatitassiornermut pisortaq Jan Berg nassuiaavoq.
Isiginnaartartup KNR-imi aallakaatitat takoreerugit kanalinut allanut nuussinnaavoq. Tamannalu isiginnaartartunut nammineerlutik toqqaanissaminnut kiffaanngissuseqarnerulersitsivoq, DR-ikkullu aallakaatitaq KNR-ikkut aallakaatinneqartaraluartoq maqaasigaanni, soorlu assersuutigalugu TV Aviisi, taava DR1 toqqarneqaannassaaq.
- Isiginnaartartuvut piffissaq qanoq ikkaluarpalluunniit aallakaatittakkavut iserfigisinnaavaat, tamannalu eqaallisitsissaaq, neriuppugullu isiginnaartartutta tamanna iluarissagaat. Maannakkorpiaq ullormut nalunaaquttap akunnera ataaseq affarlu aallakaatitsisarpugut, tamatumalu saniatigut aamma toqqorsivitsinneersunik aallakaatitsisarluta, Jan Berg oqarpoq.
- Aallakaatitassiat kalaallisoortut, periarfissaalerpat, amerlisikkiartuaarnissaat KNR-imut unamminartuussaaq, ilanngullugu oqarpoq.