Sooq seqineq nuiaarnersoq eqqoriaqattaarpaat
Seqerngup ullunik marlunnik sioqqutsilluni Ilulissani nuinera KNR-imi qanittukkut oqaluttuaraarput. Taanna pillugu nunani allanit qisuariartoqarpoq, oqallittoqarlunilu. Tamakku ilagaat Østrigimi illoqarfiit pingaarnersaanni Wienimi universitet-imi avataarsua pillugu ilisimatooq, Thomas Posch, taanna tuluit aviisianni Daily Mailimi issuarneqarluni oqaluttuarpoq, sermersuup aakkiartornera pissutaagunarluni seqineq siusinnerusukkut nuisoq.
Sermersuarooq aakkiartornermigut pukkinnerulerulermat immap nunallu killingat appariartorpoq, taamaaliluni seqineq nuisutut isikkoqalersartoq, Thomas Posh oqarpoq.
Wien-imi silasiorfimmi sulisoq, Wolfgang Lenhardt, seqernup siusikkut nuineranut allamik nassuiaateqarpoq, tassamigooq nunarsuup kaavinnerata qitermigut sulloqutaata allanngorneratigut seqineq siusissukkut nuisalersoq.
Ullorissat inissisimaffigisartagaat allanngorsimanngilaq.
Allanngorsimasuuppata nunarsuarmi tamarmi malugineqarsimassagaluarpoq.