Sondre Slettemark Future Starimi VM-ertoqarnerani ajugaasoq
Ukalermi aqqaluaa, 14-inik ukiulik Sondre Slettemark, sisoraaserluni aamma ooqattaasartartuuvoq.
Taanna unammiuaarnerni "Future Star"-imik taaneqartumi, nunaniillu 17-init peqataaffigineqartumi, Sverigemi Ă˜stersundimi sisoraaserluni nunarsuarmi pissartanngorniuttoqarnerani aaqqissuunneqartumi peqataavoq.
Sondre Slettemarkilu unammiuaarnerni ajugaavoq, Sverigemeersut marluk tulliullutik. Nunarsuarmi pissartanngorniunnerit ammarnersiorneqarneranni "Future Star"-imik taallugu inuusuttut unammiuaartinneqarput.
Nunarsuarmi pissartanngorniunnernik aaqqissuisut nukappiaaqqat 20-t, niviarsiaqqallu 20-t, VM-ip aallartinnginnerani unammiuaarfiusumi unammisippai.
Sverigemi tv-qarfik toqqaannartumik aallakaatitsivoq, EurosportPlayikkullu aamma isiginnaarneqarsinnaalluni.
- Kalaallimut 14-inik ukiulimmut sisorartartumut misigisaq nuannersoq. Taanna ukioq manna siusinnerusukkut unammiuaarnerni normu 3-nngorlunilu normu 4-nngortoq, Norgemi pisortatiguunngikkaluartumik pissartanngorniuttoqarnerani februaarimi peqataagami, Nunatsinni Biathlonertartut Kattuffiat tusagassiutinut taama allaaserisaqarpoq.