Sondre Slettemark sisoraaserluni ooqattaanermi World Cupimut annguttoq
18-inik ukiulik, World Cupimilu unammiuaarnernut anngunnikoq. Tassa Sondre Slettemarkip IBU Cupimi Sverigemi decembarip aallartisimalaarnerani unammiuaarnerni angusaa.
Sisoraaserlutik ooqattaasartartut 110-t Sverigemi peqataapput, Sondre Slettemarkilu normu 48-tut inissilluni. Ajugaasumit 25-nik ukiulimmit, Norgemeersumit Endre Strømsheimimit minutsinik marlunnik sekundinillu 36-nik kigaanneruvoq.
Sondre Slettemark 97 IBU-pointinnappoq, World Cupimullu anngunnissamut annerpaamik 125 IBU-pointinnattussaalluni.
International Biathlon Union World Cupimi unamminissamut arfineq-pingasunut periarfissiisarpoq, taakkulu nunanit World Cup-imut peqataatitaqartussaanngereersunut tunniunneqartarlutik.
Sondre Slettemark angusarissaarnini pissutigalugu sisoraaserluni ooqattaanermi Sloveniami, Tysklandimi Italiamilu januaarimi World Cup-eventseqarnissaanut pingasunut annguppoq.
Ilinniarnertuunngorniarfik salliunniaraa
Naak Sondre Slettemark World Cup-eventseqarnissaanut anngutereersimagaluarluni periarfissaq tamanna atornianngilaa.
Ilinniarnertuunngorniarnermimi salliuteqqaarnissaa aalajangersimavaa.
- IBU Cupimi unammiuaarnerni angusakka tulluusimaarutigalugillu soorunami iluarisimaarpakka, nunarsuarmilu pikkorinnerpaanut unammisinnaanngornera nuannaarutigalugu. Kisianni ilinniarnertuunngorniarfimmi 3.G-miippunga, ilinniarnerullu nalaani angalasarnissamut maannakkuugallartoq piffissaqarpallaanngilanga, Sondre Slettemark tusagassiutinut nalunaarummi ilaatigut allappoq.
Norges Cupimik taallugu unammiuaartarnernut, inuusuttullu nunarsuarmi pissartannngorniunnerannut, tassa Junior VM-imut ukioq manna peqataanissani, sungiusaasunilu qangalili siunniussimallugit ilanngullugu oqaatigaa.
- Norges Cupimi siorna ajugaavunga. Norges Cupimilu ukioq manna angusarissaarnissara kissaatigaara, cupimilu ataatsimut isigalugu pikkorinnerpaat akornanniikkusullunga.
- VM-imilu siorna normu 20-tut inissinnera ukioq manna pitsaanerusunngortikkusullugu. Inuusuttut akornanni junior VM-imi ukioqqortunerit akornanni Youth-klassimiilernikuuvunga, unamminernilu taakkunani angusarissaarnissamut periarfissagissaarpunga, Sondre Slettemark tusagassiuutinut nalunaarummi naggasiullugu oqarpoq.
Sondre Slettemark Norges Cupimi unammiuaarnerni siullerni januaarip ulluisa arfineq-aappaanni arfineq-pingajuannilu peqataassaaq, inuusuttullu nunarsuarmi pissartanngorniunnerannut Junior VM-imut marsip aallartisimalaarnerani aamma peqataassalluni.