Somaliap akeraa præsidentiata illersorpaa
Præsidentip nunamik nunaminik saassussisumik illersuisarnera ulluinnarsiutaanngilaq, kisianni Somaliap præsidentia taamaaliorpoq.
Taanna oqarpoq Somaliap kujataani illoqarfiit marluk USA-mit saassunneqarnerat pissusissamisuuginnartoq.
Somaliap præsidentia oqarpoq USA saassussissalluni pisinnaatitaasoq. Tassami saassunneqartut tassaapput peqqarniisaarniat 1998-imi Tanzaniami Kenyamilu Amerikamiut aallartitaqarfiinik saassussisimasut, aallartitaqarfinni taakkunani sulisut hunnorujulikkaat toqutaanerannik kinguneqartumik.
Amerikamiunit saassunneqartut tassaapput Somaliap kujataani nunaannarmi illoqarfiit marluk Kenyamut killeqarfiup eqqaaniittut. Qassit toqutaanerannik ikiligaasunillu nalunaaruteqartoqanngilaq, taamaattorli isiginnittut oqaatigaat Amerikamiut timmisartumit qaartartunik nakkaatitsinerannit toqutaasimasunik takussaasoqartoq.
Somaliami saassunneqartut tassaanngillat talebanit sorsuttartui, tassaallutilli peqqarniisaarniat al-Qaedamut attuumassuteqartut. Taakkua muslimit sorsuttartui allat hunnorujulikkaat peqatigalugit qimaasuupput. Somaliap naalakkersuisuisa sakkutuuinit aamma Etiopiap sakkutuuinit qimaatitaasut. Maannalu tassa USA maanna ilaaqqussimavoq.
Nunami tamaani Amerikamiut qangali sakkutooqartitsipput musliminut sakkuaattartunut akiuuttunut ilaallutik, ilaatigut tamaani nunasiaateqarsimasut franskit sakkutooqarfianni sakkutuuleeqataasimallutik.
Piffissami kingullermi Amerikamiut timmisartui sorsuummit mittarfilimmeersut Somalia qulaavaallugu misissuillutik timmisaqattaarput. Maannalu Somaliap præsidentiata akuersineratigut saassussisimapput.
