Somaliamiut sisamat kalaallinik paannissimanertik pissutigalugu maanna killisiorneqarput

Imigassamik ikiaroornartumillu Danmarkimi atornerluisartut unnuisarfiata, Sundholmip, eqqaani kalaallit somaliamiullu ippassaq ualikkut paggiserujussuarput, angutillu sisamat Københavnimi massakkorpiaq killisiorneqarput.
maajip 18-at 2009 06:28

Paggittoqareersorlu inuit katillugit 16-it tigusarineqarput, politiillu oqarnerat naapertorlugu qisuit anaattat, saviit ulimaallu ataaseq pagginnermi sakkugineqarsimapput, tigusarineqartunit 16-iusunit aqqaneq-marluk iperagaaqqereerput, taakkuli piliaat politiinit suli misissuivigineqarput.

Kalaallit marluk aqqunartitersimaqisut napparsimmavissuarmut Rigshospitalimukaanneqartariaqarsimapput, politiilli oqarnerat naapertorlugu taakku inuunerat navianartorsiunngilaq.

Pagginnermut suna aallarniutaasimanersoq suli iluamik paasineqanngilaq. Unnuisarfimmi pisortaq, Gertrud Sørensen, ullaaq-manna oqarpoq, pagginnermut pissutaasoq suli paasinagu, tusatsiakkalli ullumikkut imaaginnavissut. Politiit oqarnerat naapertorlugu kalaallit somaliamiullu akornanni tallimanngormat aaqqiagiinngittoqarsimavoq. Saammaateqatigiinniarlutik ippassaq ualikkut naapikkaluarput, tamannali tassa pagginnerujussuarmik kinguneqarluni.

Killisiorneqartut sisamat tamarmik somaliamiuupput, paragraf 245-millu unioqqutitsisimasutut tamarmik unnerluutigineqarput, paragraf 245 tassaavoq naakkittaatsuliorluni ulorianartumik nakuuserneq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq