Somaliamioq sakkortunerusumik pillarneqariaannaasoq

Angut 28-nik ukiulik, titartaasartumut Kurt Westergaardimut ulimaaserluni isertoq, pinerliiniarsimasutut pisortatigoortumik maanna unnerluunneqarpoq. Taamaalilluni toqutseriaraluarsimasutut pillaassutaasartumit sakkortunerusumik pillarneqarsinnaanini naatsorsuutigisinnaavaa.
januaarip 11-at 2010 09:47

- Inatsimmik unioqqutitsisimasutut pisuutinneqassappat, pinerliiniartartut pillugu inatsimmi paragraffip pillaatigitinneqartussaq sakkortunerulersippaa, matumalu kinguneranik sakkortunerusumik pillaatissinneqarnissani naatsorsuutigisinnaavaa, Østjyllandip politiivini unnersuussisut pisortaat, Marian Thomsen oqarpoq.

Kurt Westergaardimik toqutseriaraluartutut unnerluussut pinerliiniaraluarnermut qaffanneqarmat suliaq Inatsiseqarnermut ministereqarfiup maanna nalilersortussanngorpaa.

Angummut somaliamiuusumut unnerluussutitut allakkiami pinerleeriaraluarneq aamma inaarutaasumik allaqqassanersoq ministereqarfiup aalajangertussanngorpaa.

- Pinerliiniarfiugaluartumi pisut paasiuminarluartut oqartoqarsinnaavoq, paarlattuanik taama iliorniarnermut patsisaasoq eqqarsaatigalugu pisut paasiuminaassimallutik. Taamaattumik suliassaq taanna qaammatit pingasut arfinillilluunniit qaangiuppata eqqartuussivimmut aatsaat anngunneqassanersoq oqaatigiuminaappoq.

28-nik ukiulik, somaliamiuusoq, politiit isertortumik paasiniaasartui malillugit Afrikap kangiani pinerliiniartartut qullersaannut attavilik, januaarip 27-at ilanngullugu tigummigallarneqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq