Somaliami qaartartumeerisoqarmat 200-t sinnerlugit toqutaasut
Somaliami illoqarfiit pingaarnersaanni, Mogadishumi, arfininngormat qaartartumeerisoqarmat toqutaasut ikinnerpaamik 231-nngorlutik amerlipput, ikilerneqartullu 200-nit sinneqartunut amerlillutik. Nunami politiit taama paasissutissiipput.
Taamaalillunilu saassussinermi toqutaasut islamisiortut ingasaassiniat 2007-imi pikitsitsilermatali aatsaat taama amerlatigipput.
Lastbiilimi qaartartoq akunnittarfiit ilaata eqqaani aqquserngit naapiffianni naalakkersuisullu illuutaasa arlallit inissisimaffianni arfininngormat qaartinneqartoq, politiinit oqarput.
Qaartartoq alla illoqarfiup ilaani Medinami nalunaaquttap akunneri marluk qaangiuttut qaarpoq.
Saassussinermut akisussaasuunerartoqanngilaq, somaliamili naalakkersuisut ingasaassinianut al-Shabaabimut innersuussipput. Ingasaassiniat taakkua sakkutooqarfinnut Somaliap kujasissortaaniittunut qitiusortaaniittunullu saassussisarnerat amerlisimapput.
/ritzau/Reuters