Somalia-mi ajunaarnersoqarsinnaanera aarlerigaat
Naalagaaffiit Peqatigiit Somaliami ajunaarnersuaqarsinnaanera aarlerisaarutigaat.
Qaammatit marluk ingerlaneranni illoqarfiit pingaarnersaanni Mogadishu-mi akersuuffiusunit inuit 321.000-it missaat qimaasimassangatinneqarput. Naalagaaffiit Peqatigiit qimaasunut qullersaqarfiat – UNHCR – ullumi taama nalunaaruteqarpoq. Qimaasullu amerliartortuarsinnartut oqaatigineqarpoq.
- Qimaasut affangajaat nunap immikkoortuinut qaninnernut Middle-mut aamma Lower Shabelle-mut qimaasimapput. Illoqarfiit pingaarnersaannit suli qimaasunik ingerlaartoqartuartoq, UNHCR-imit oqaaseqartitaq Ron Redmond oqarpoq.
Ikiuiniat UNHCR-imeersut ippassaq illoqarfiit pingaarnersaata kitaani 30 kilometerinik kippasinnerusumiittumi illoqarfimmi Afgooye-mi qimaasunut 40.000-iusunut ikiuutissanik tunioraapput. Naalagaaffiit Peqatigiit Somaliami ikiuiniarnermi ataqatigiissaarisuata, Eric Laroche-p Mogadishu-p eqqaani akersuunnerit sakkukillisinneqanngippata ikiuutissallu apuunneqarsinnaajunnaarpata ajunaarnersuaqarsinnaanera aarlerisaarutigaa.
