Solveig Jakobsen kalerrisaarut appimmat:- Siulleq eqqarsaatiga sorsuttoqalernerpa?
Sapaat nalinginnaasumik eqqissisimaarfiullunilu qasuersaarfiusaraluartoq, Nuummi upalungaarsimanermut kalerrisaarut sapaammi 07:40-p missaani appippoq.
Innuttaasut ilaat Solveig Jakobsen sorsuttoqarnasorilersimagaluarlugu KNR-mut oqaluttuarpoq.
Ajunaarnersuaqarnerani kalerrisaarut aallartippat imaaliussaatit:
Siggarnera siulleq: 'Iserit'
Nippakkiartoriarluni nipikilliartortoq . Siggarnera sekundini 45-ni sivisusseqartoq sisamariarluni uterneqassaaq.
- Taava isissaatit, matut, igalaat silaannarissarfiillu matussavatit.
- KNR TV-mi radiomiluunniit paasissutissanik misissuigit.
- Siggartaatip aappaa utaqqiuk: 'Navianartoq qaangiuppoq'.
- Pisortat KNR TV-kkut radiokkulluunniit navianartorsiornermik qaangiuttoqarneranik nalunaaruteqarnissaat utaqqiuk.
Siggarnerata aappaa: 'Navianartoq qaangiuppoq'
Sivisuumik siggartitsitsineq sekundinik 45-nik sivisussusilik.
- KNR TV imaluunnit radio navianartup qaangiunneranik nalunaaruteqarpoq.
- Maanna illup iluanit aneqqissinnaalerputit.
Tusarfik: Upalungaarsimanermut ataatsimiititaliaq
-Nunarsuatsinni pisut eqqarsaatigalugit, ingerlaannaq eqqarsaleraluarpunga russit qaartartumeeriniarsarilernersut, ingerlaannaq igalaani timmisartussarsioraluarpunga, Solveig Jakobsen oqarpoq.
Nuummi kalerrisaarutip aallartinnerata kingorna innuttaasut paatsuungaqisut Facebookikkut allattut arlaqarput.
Solveig Jakobsen qanoq iliornissamik nalornisunut ilaavoq, nittartakkakkullu malinnaaginnarsimalluni.
- Pisumi qanoq iliussanerlunga nalornivunga, Facebookkikkut susoqarnersoq marserpara, nutaarsiassatigut aatsaat akunneq ataaseq qaangiummat nalunaarutigineqarami.
AAMMA ATUARUK Politiit isumannaallisaanermi minneq pillugu kalerrisaarineq: Innuttaasut toqqissisimannginnissaat siunertaanngilaq
Upalungaarsimanermut kalerrisaarutit pillugit ilisimasaqarnerulersulluni Solveig Jakobsen KNR-mut oqarpoq.
- Nalunngilara upalungaarsimanermut kalerrisaarut, ajunaarnersuaqartillugu tassaarsuaqartilluguluunniit atorneqartartoq. Iluamik allamik ilisimasaqanngilanga, taamaammat iluassagaluarpoq tullissaani taamaattoqassappat qanoq iliussanerluta paasisutissiisoqarpat.
Ane Villadsen aamma eqqarsaleraluarpoq sorsuttoqalernersoq
Solveig Jakobsennilu kisimi annilaarsimanngilaq.
Aamma Ane Villadsen tupassimaqaluni KNR-mut oqaluttuarpoq.
-Sofami issiarusaarlunga nilliasaat sapaataannarsuarmi appimmat assut tupaallappunga, ingerlaannaq igalaat tungaannut susoqarneranik marserpunga. Nilliasaat unimmat timmisartoqarpaluttoq tusaallugu, eqqarsaleraluarpunga sorsunneqalernersugununa, Ane Villadsen KNR-mut oqarpoq.
AAMMA ATUARUK - Naagga kalerrisaarineq kukkunerunngilaq: upalungaarsimanermut pilersaarut malinneqarpoq
Taanna nittartakkakkut misissuinermini aatsaat paasisaqarsimalluni KNR-mut oqarpoq.
- Nittartagaq aatsaat ammarakku paasivara timmisartoq pillugu nilliasaat appittoq, taamaattoqartillugu susoqarneranik paasissutissiisoqarpallattariaqarpoq, Ane Villadsen oqarpoq.
Air Greenlandip timmisartuutaa Nuummiit Kangerlusuarmut aallarnermini motoriata aappaa ajornartorsiulerpoq. Taamaammallu sillimaniarluni Nuummut uterluni mikkiartoqqippoq.
Timmisartoqqarfiup atortorissaarutaasa illutaani ingerlatsisup periusissani malillugu iliuuseqarpoq. Illoqarfimmiittulli siggartaatit aallartinnissaat siunertaanngikkaluarpoq. Kalerrisaarineq qatserisarfimmut - politeeqarfimmullu annguttussaagaluaq illoqarfimmut tamarmut annguppoq.
Kommuneqarfik Sermersuumi upalungaarsimanermut pisortaq, Knud Petersen, KNR-imup ippassaq oqarpoq.
Ajunaarnersuaqalernerani kalerrisaarutit illoqarfik tamakkerlugu aallartinneqarnera teknikkikkut kukkunersusoq, tamannalu qatserisarfittaamiit aaqqinneqartoq ilanngullugu ilisimatitsissutigineqarpoq.
