Soleimanip kingoraartaata USA-mut akiniaanissartik neriorsuutigigaa
Iranip naalagaaffiani nutaarsiassaqartitsiviit taama nalunaaruteqarsimasut, nutaarsiassaqartitsiviup Reutersip Danmarkimi nalunaaqutaq naapertorlugu ataasinngornermi ullaaralaakkut allaaseraa.
Esmail Qaanip, Qassem Soleimani amerikamiut Bagdadimi dronemik tallimanngormat qaartartumeerineranni toqutaasoq, paarlappaa.
Qaanip siorasaarinertik Iranip nalagaaffiata TV-qarfiatigut ilaatigut nalunaarutigaa.
Soleimanip, uppernini pillugu toqutaasup, pingaartitaminik salliutitseriaaserisimasaanik nangitsinissarput neriorsuutigaarput, tamannalu USA-p nunatta ilaaniikkunnaartivinneratigut taamaallaat angusinnaavarput, Reuters naapertorlugu Qaani oqarpoq.
Qaani sakkutuut Qudsikkut naalagaanertaata tulliatut 2006-imili atuuffeqarpoq, taamaattumik Soleimanip qanimut suleqatigisarsimallugu.
- Guutitta ajugaqanngitsuusup akiniaanissani neriorsuutigaa, Guuterpullu akiniaanissatsinnut aalajangiisuuvoq. Iliuuseqarnissarput qularissanngivipparsi, nutaarsiassaqartitsivik AP naapertorlugu Qaani oqarpoq.
AAMMA ATUARUK Irakip illoqarfiisa pingaarnersaat sapaammi saassunneqartoq
Inuppassuit Qassem Soleimanimut ataqqinninnertik takutinniarlugu Iranimi illoqarfiit pingaarnersaanni, Teheranimi, ilisaanerani katersuullutik najuutileruttorneranni Qaanip akiniaanissartik nalunaarutigisimagaa, nutaarsiassaqartitsiviup AFP-ip allaaseraa.
Ayatollah Ali Khameneip sakkutuut naalagaanertaajusimasumut - Iranimi pingaarneruteqarnerpaat ilaattut isigineqarsimasumut - Teheranimi ilisimatusarfiup eqqaani qinnussinissaanut inuppassuit katersuukkiartorput, qassiiusullu Soleimanip asserujussuinik tigummiarput.
Soleimanip pania inuppassuarnut katersuuttunut oqalugiartut ilagaat, taassumalu angutaata toqutaanerata kingunerisaanik USA-mut Israelimullu saassussinissartik neriorsuutigaa.
- Silanngajaartoraa Trump, isumaqassanngilatit ataataga uppernini pillugu toqutaammat suna tamarmi qaangiuttoq, Reuters naapertorlugu Zeinab Soleimani oqalugiarnermini oqarpoq.
Nutaarsiassaqartitsiviup NBC Newsip ilanngutassiortua, Ali Arouzi, Teheranimi pisut pillugit Twitterikkut ima allappoq:
- Inunnik katersuuttunik taama amerlatigisunik siornatigut takunikuunngisaannarpunga. Aliasorrallutillu puffassimaarrammata amerikamiunut akiniaanissartik taakkuninngalu toqoraanissartik suaarutigisaqattaarpaat, Ali Arouzi allappoq.
