Timmisartup B-52-ip qaartartorsuarnik usisup, 1968-imi Qaanaap eqqaani nakkarnerata kingorna, Qaanaap eqqani saliillutik sulisut, Danmarkimit sumiginnagaasimasut, EU-parlamentimit suliaritinneqarsimasup, isumaliuutissiissutip tamanna ersersinniarpaa.
Isumaliuutissiissut Euratom traktatimut tunngasoq aqagu EU-mit saqqummiunneqassaaq ilimagineqarporlu amerlanerussuteqartunit akuerineqassasoq. Euratomimilu allaqqavoq, Qaanaap eqqaani 1968-imi sulisimasunut suliat assingusut, inuttai ukiut tamaasa nakorsanit misissorneqartassasut.
Nunarput sinnerlugu folketingimi ilaasortaq Sofie Rossen, Inuit Ataqatigiinneersoq isumaqarpoq, EU-mit piumasaqaataasoq Danmarkimit sumiginnarneqarsimasoq.
- Danmarkiminngaanniit taanna ingerlanneqarsimanngilaq, soorlu aamma siunissami taamatut assingusumik pisoqassagaluarpat, pisariaqartorujussuuvoq taamatut suliaqarnikuusimasut misissuiffigilluarnissaat. Aamma taamatut eqqugaasimasut ornitaqarsinnaanissaat pisariaqarpoq.
Ilimagineqarpoq statsministeriusimasoq Poul Nyrup Rasmussen EU-mi ilaasortat piumasaqarnissaanut akerliussasoq, tassungalu tunngatillugu Sofie Rossen ima oqarpoq:
- Suliaq una ingerlagallarmalli suliaq una ingerlalernikuuvoq, taamaammat nammineq suliarinngitsoorsimasani soorunami illersorniartussaavaa.
Ilimagineqarporli EU-mi ilaasortat amerlanerussuteqartut euratom-traktatimi allaqqasoq taasissutigineqarpat Danmarki ajorsartinneqassasoq, tassungalu atatillugu Sofie Rossen oqarpoq, EU-mit piumasarineqartoq, tassalu qinngornernik ulorianartunik suliaqarsimasut kikkulluunniit, ukiut tamaasa nakorsanit misissugarineqartarnissaat Danmarkip malittariaqassagaa.
Thule-mi saleeqataasimasut, qinngornernik ulorianartunik saliisimasut, Euratom-traktaatimi allaqqasoq inatsisit malillugu, ukiut tamaasa misissortinneqartarnissaat danmarkimit itigartinneqarsimavoq.
Margrethe Auken, SF-i sinnerlugu EU parlamentimut ilaasortaasoq isumaqarpoq, EU taamatut nalunaarusiulersaarnera angusassaqarfiunavianngitsoq, innersuussutigaalu Danmarkip misissuititsisarsimaneri, takutitsisut, Thule-mi sulisuusarsimasut nappaataat qinngornernik ulorianartunik aallaaveqanngitsut.
Folketingimi nunarput sinnerlugu ilaasortaq IA-meersoq Sofie Rossen taama oqarpoq.
EU-p isumaliuutissiissutaa aqagu akuerineqarluni taasissutigineqarnissaa ilimagineqarpoq.