Sofia Rossen: Qallunaat nunatsinnik ilisimasakippallaarput
Sofia Rossenip Juliane Henningsen, Inuit Ataqatigiit, januaarimiit oktobarip tungaanut folketingimit sulinngiffeqarnerani paarlaqqavaa.
Sofia Rossen folketingimi paarlattaanini pillugu ima oqarpoq:
- Issiavimminngaanniik allaminngaanniik issialluni pissutisit allat takullugit aamma imaannaanngilaq. Pingaarnersiuisariaqarsimavunga nunatsinnut suut pingaarnerunersut nalilersorlugit. Suut atorluarsinnaavagut aamma uanga tassani issiavimmi issiatillunga suut saqqummiunnissaat pisariaqarnikuusimappat? Artornangaatsiarpoq ulluinnarni pulaffigineq ajukkakka pulaffigisussaasimagakkit, Sofia Rossen oqarpoq.
Sofia Rossen isumaqarpoq Qallunaat Nunaanni Kalaallit Nunaat pillugu ilisimasakippallaarneq pissutaalluni naalagaaffeqatigiinneq apeqquserneqartariaqartoq.
- Qallunaat Danmarkimi najugallit amerlanerpaarpaat nunatsinni pissutsit ilisimanngilaat. Ilaasa naluaat qanoq inuunersugut, ilaat allaat isumaqarput qimuttuitsortoqarsinnaasoq Narsarsuarmiik Qaanaamut. Akuerinartissinnaangilara, tassami Danmarkiminngaanniit oqaatigiuaramikku naalagaaffeqatigiittugut. Kisianni immaqa apeqquserneqarsinnaavoq qanoq-una taanna isumaqartoq. Isumaqarpunga arlaatigut apeqquserneqartariaqartoq qanoruna ingerlaniartugut, Danmark Kalaallit Nunaallu. Uanga isumaqarpunga piffissaq sivisoorujussuaq atortariaqassagipput nunarput saqqummiutissagutsigu aamma misissueqqaarluta suut saqqummerunik ajunnginnerpaanersut allallu ilanngullugit, Sofia Rossen oqarpoq.
