Inunnut attaveqaatit quppernerit ilumoortuunngitsut 276-it Trumpimik nersorinnittut piiaraat
Inuit ataasiakkaat inoqatinut attaveqaammi Facebookimi qupperneri 200-t quppernerillu allat 55-it, USA-p præsidentianik Donald Trumpimik nersorinnittut Facebookimit peerneqartut, Facebookip nalunaarutigaa. Inuit ataasiakkaat inoqatinut attaveqaammi Instagramimi qupperneri 76-it aamma peerneqarsimapput. Facebookip Instagram pigivaa.
Quppernerit pineqartut ilumoortuunngitsut, inoqatinut attaveqaatit marluk taakku isumaqarput.
Inuit ataasiakkaat quppernerigunagaanni pissusilersornerit apeqquserneqarput, tassami allaaserinnittoqarani nutaarsiassanut assigiinngitsunut oqaaseqaateqartoqarnerullunilu qisuariartoqarnerusoqartartoq maluginiarneqarpoq. Facebook taama ilisimatitsivoq.
AAMMA ATUARUK Facebookip USA-mi præsidentimut qinersinissamut allagarsiussat salloqittaatit inerteqqutigigai
Donald Trumpip republikanerillu nersorniarneqarnerisa saniatigut USA-mi demokratit præsidentimullu qinigassanngortitaat, Joe Biden, quppernerni isornartorsiorneqarput.
Facebookimi quppernerit pineqartut 370.000-nit Instagramimilu quppernerit 22.000-nit malinnaavigineqarput.
Facebookip Instagramillu quppernerit ilumoortuunngitsutut nalilerneqartut akuttunngitsumik piiartarpaat, Amerikami nunanilu allani quppernerit piiarneqartarlutik. Politikkikkut oqallinnerit qineqqusaarnerillu sunniuteqarfigineqannginnissaat siunertaavoq.
