SMS-ikkut siunnersuisarfik ukiumik ataasinngortorsiortoq
MIO-p SMS-ikkut siunnersuisarfia meeqqanit inuusuttuniillu SMS-inik 11.000-init amerlanerusunik allaffigineqarlunilu akisisimavoq. MIO tusagassiuutinut nalunaarummi taama allappoq.
Meeqqat inuusuttullu 1200-t missaat siunnersorneqarsimasut, Meeqqat Illersuisuata Aaja Chemnitz Larsenip oqaatigaa:
- Nalilerparput SMS-ikkut siunnersarfitta meeqqat 1200-t missaat siunnersorsimagai, arlallit arlaleriarlutik saaffiginnittarmata, Aaja Chemnitz Larsen oqarpoq, nangillunilu:
- Naatsorsueqqissaarisarnerput ingerlaavarpoq. Ukiup affaata siulliup ingerlanerani qaammammut 200-250-it missaannik saaffigineqartarpugut, taamatullu suli ingerlaannarpoq. SMS-inik siunnersuisarfik maannamut ukioq ataasiinnaq ingerlareerpoq, taamaammat malunnarpoq SMS-ikkut siunnersuisarfeqarnermik ilisimaarinninneq meeqqanut annguniaqqaarsimasoq. Taamaattumillu qaammatit siulliit illoqarfiit aalajangersimasut ilaannit saaffiginnissutit amerlasimapput, Meeqqat Illersuisuat oqarpoq.
Sap. ak. naanera ammasalernissaa kissaatigineqartoq
SMS-ikkut siunnersarfik ualikkut nalunaaqutaq sisamat arfinillillu akornanni ulluinnarni ammasarpoq, Aaja Chemnitz Larsenillu MIO sinnerlugu kissaatigaa SMS-ikkut siunnersuisarfik sivitsiorneqassasoq, sapaatip-akunnerisa naanerini aamma ammasarsinnaanissaa kissaatigineqarluni.
- Meeqqamut oqimaatsorsiortumut utaqqineq sivisusinnaavoq. MIO siusinnerusukkut niviarsiaqqamik ullaap tungaani saaffigineqarsimavoq imminorniarluni eqqarsaateqartumik, siunnersuisarfilli ualikkut ammarmat imminoreersimavoq, MIO allappoq.
MIO SMS-ikkut siunnersuisarnerup ingerlanneqarnissaanut ingerlaavartumik aningaasanik qinnuteqartarpoq, ilaatigullu ingerlanneqarneranut Ilaqutariinnermut Inatsisinillu Atuutsitsinermut Naalakkersuisoqarfimmit tapersersorneqartarluni, soorlu aamma NunaFonden pikkorissaasarnermut aningaasaliisartoq.