Syriami meeraaqqat qiullutik toqorartut
Syriamiut naalakkersuisuisa sakkutuui decemberip qaammataanili annertuumik saassussinerisa kingorna, inuit 900.000-t missaanniittut Syriap avannamut kippasinnerusortaaniittut angerlarsimaffimminnit qimaasariaqarsimapput.
Naalagaaffiit Peqatigiit ataasinngornermi taama nalunaaruteqarput.
Siusinnerusukkut nalunaarugineqartunit 100.000-nik amerlanerupput.
Qiianarpallaarnera qimaasunullu ikioqqaarfiit ulikkaaqqaneri pissutigalugit meeraararpassuit toqorarsimasut, Naalagaffiit Peqatigiinnit aamma nalunaarutigineqarpoq.
- Syriap avannamut kippasinnerusortaani ajornartorsiornerujussuit amiilaarnartorujussuarmut killippput, Mark Lowcock, Naalagaaffiit Peqatigiit qimaasunut ikiuiniarnermut pisortaa taama oqarpoq.
Taassuma ilanngullugu oqaluttuaraa, arnat meeqqallu annerusumik qimaasuusut.
- Kingunerlutsitseqqapput aamma qiianartorujussuarni sinittariaqartarput, qimaasunut inissat ulikkaaqqammata, Mark Lowcock oqarpoq. Anaanat plastikkinik ikumatitsisariaqartarput, meeqqatik kissalaartinniarlugit. Meeraaqqat inoorlaallu qiullutik toqusarput, Mark oqarpoq.
Inuit tre millionit missaannik amerlatigisut Syriap avannamut kippasinnerusortaani Idlibimi najugaqarput. Taakkunannga affaat nunap immikkoortuanit allanit tassunga qimaasimapput.
Idlip Syriamiut naalakkersuisuisa sakkutuuvinit aqunneqartut kingullersaraat.
