Sky Factor pissanganartumik naggaserpaat
![](/sites/default/files/styles/image_934x467/public/article_images/sky_0.jpg?itok=XoAZPsYX)
Finalemi pissanganaqisumi Pipaluk Lind Nuummi siullerpaamik Sky Factoreqarnerani ajugaavoq. Aaqqissuussinermi akisussaasoq Victor Næss Nielsen assut tulluusimaarpoq ajugaasussarsineq unamminerlu nuannersoq naammassilluarmata.
- Ilimagisatsinniit Sky Factor iluatsilluarneruvoq. Ilimagisatsinniit peqataasut amerlanerupput tusarnaariallu aamma takkussorluarsimallutik. Qularutissaanngilaq aappaagu taamaalioqqinnissarput aammalu avatangiisivut suli taamanikkornissaanut pitsaanerulersimajumaarput atortuvut pitsanngorsarneqareerpata, Victor Næss Nielsen oqarpoq.
Finale sioqqullugu peqataasut pissangapput. Ilaat issiapput qummuinnarlu ukkissillutik ilaat pissanganaversaasiullugu erinarsorujoortut, arpattut imaluunnit kisimik pisuaqerujoortut. Naak pinnatassat ataqqinassuserlu pineqaraluartut peqataasut akornanni pissuserissaarneqarpoq imminnullu tapersersoqatigiillutik unammipput.
- Erinarsuutit erinarsukkakka anaanannut eqqaassutissaapput taannalu qaammatit arlaqanngitsut matuma siorna kræftimik napparsimallu toqukkut qimaguppoq. Erinarsorneq assut iluaqutigisimavara aliasunnerup qaangerniarnerani, Renata Andersen oqarpoq, Hans Henrik Poulsenilu ilaliivoq: Assut peqataalluni pissanganarpoq tusarnaartut saallugit appisimaarneq pikkunaqaaq. Allatut iliorfiunngilaq nuannisarfiinnagassaavoq.
Sky Factorimi kina ajugaasuussanersoq tusarnaartutn aalajangerpat finalemilu assut naligiinneqarpoq. Siulliit pingasut akornanni taasinerit pingasut taamaallaat nikingassutaapput taakkulu pingasut ukiamut akunnittarfimmi tusarnaartitseqataassapput. Pipaluk Lind Carol Kingip sanaavanik "You got a friend"-imik atuilluni ajugaavoq.
- Aarleqqutigisimagaluarparput ikinnguteqarnerpaap ajugaanissaa, qujanartumilli naliliisut pitsaasumik naliliipput. Finalemi peqataasut sisamat tamarmik ajugaasimasinnaagaluarput aamma qularutiginngilara piukkunnartut nutaat manna saqqummerfigigaat. Sapaatip akunnerata tulliani misissuataassavarput aappaagu qanoq iliorsinnaanerluta Sky Factor akunnittarfimmi maani ingerlanneqaqqilerpat, Victor Næss Nielsen oqarpoq. Naggataatigullu tusarnaariat ilaat isinngitsoortariaqarsimapput Sky Line ulikkaarmat.