Qaqortup eqqaani angallat ikkarlittoq
Nutartigaq nal. 11.18.
Qaqortup eqqaani angallat arfininngornermi ualikkut tallimanngulersoq ikkarlippoq. Illersornissaqarfiup oqarneratut angallat aalisariutaavoq.
Kalaallit Nunaanni Politiit tusagassiisartuat Camilla Palmann taama paasissutissiivoq.
Inuit arfinillit ikkarlinnermi angallammiipput, ajoqusertoqarsimananili.
Kilisaat Narluneq pineqarpoq, taanna Iluliaq Seafoodimit pigineqarpoq.
Qaqortumi Politiit qatserisartullu ataasinngormat angallammiipput. Tassani angallatip igalaavi ammasut naammattoorpaat.
Qaqortumi politiini politiassistenti Søren Arnth Hansen suliamut atatillugu ima oqarpoq:
- Inuit angallammut qanillattunnginnissaat kaammattuutigaarput, angallat qaqinniarneqaleruttormat. Taamatullu angallammit arlaannik tigusisoqassappat pillagaanermik kinguneqarsinnaavoq.
Suliaq Imarsiornermut Aqutsisoqarfimmut ingerlateqqinneqarpoq.