Skateboarderneq ilinniagaqarnerlu - ataatsikkut?

Skateboardertarfik nutaaq Nuummi ammarneqangajalerpoq, Sisimiunilu taamaattumik angisuumik aamma sanasoqassamaarpoq. Ilinniagaqartut taamaattuliornerni suleqatigineqarput.

Sisimiuni Nuummilu cykilertarfimmik skaterbordertarfimmillu kusanaqisunik ukiuni kingullerni marlunni sanasoqarpoq, skaterboardertarfillu nutaaq Nuummi sapaatip-akunneri marluk qaangiuppata ammarneqassaaq.

Cementiliornermi, betonimillu kuisinermi, Sanaartornermik Ilinniarfimmi Saviminilerinermillu Ilinniarfimmi ilinniartut illoqarfinni taakkunani marlunni iluaqutaaqaat.

Nuummi Qinngutsinni skateboarderfissaq Hans Lyngep Atuarfiata tunuatungaaniissaaq.

Saviminilerinermik Ilinniarfimmi ilinniartitaanermut pisortap, Ole Pedersenip, suleqatigiinnertik ima oqaluttuaraa:

- Suliaq immikkorluinnaq ittuuvoq, ilinniartunut assut unammillernarluni kajuminnarlunilu, namminnermi sanaartik kingusinnerusukkut aamma atortalersinnaavaat. Oqarsinnaanngussappummi: Takkuuk, uuminnga uanga sanaqataanikuuvunga. Tamanna ajunngeqaaq, inuusuttummi aamma susassaqartinneqarput.

Savimilerinermik Ilinniarfimmi ilinniartitaanermut pisortap oqaluttuaraa, skaterboardertarfissaq ilinniartut uuttortaqqissaariarlugu, qarasaasiarlu atorlugu ilusilersoqqaariarlugu, skateboardertartut kissaataat maleqqissaarlugu ilusilersorsimagaat. Suliaq ilungersunartoq, ilinniartunut unamminartoq.

Ilinniartunik suleqateqarneq kommunimit iluarineqaqaaq:

- Inuusuttunik ilinniartunik aatsaat taama annertutigisumik suleqateqarpugut, tamanna siornatigut misilinneqarsimanngilaq, Kommuneqarfik Sermersuumi teknikkimut immikkoortaqarfimmi pilersaarusiornermut pisortaq, Lars Pedersen, oqarpoq.

Skatebordertarfiliornissamik aallarnisaasut tassaapput Urban Greenland, peqatigiiffik aamma sanaqataasoq. canadamiut skateboardertartut arfinillit aamma qaqortumik kusanaqisumik bowliliorput. Saviminilerinermik ilinniartut savimineq namminneq isumagaat.

- Saviminilerinermik Ilinniarfimmi ilinniartut suleqatigilluaqaavut. Ilinniartorpassuit namminneq ristiliorput, tamannalu assut unammillernarsimavoq, naammassisaalli kusanaqaat, savimerngit tamaasa namminneq isumagaat, aamma skateboartertarfiup sinaakkutaat. Taama kusanartitigimmata canadamiut ilinniartut kakkanaaqaat. Ilinniartut oqaluttuuppaannga, suleqataanertik nuannareqalugu, suliartimmi piviusunngortussaasoq nalunnginnamikku, Urban Greenlandimi pilersaarusiornermut pisortaq, Natalie Genét, oqarpoq.

- Sisimiuni bowli 100 kvadratmeteriuvoq, Nuummilu Qinngutsinni skateboardertarfissaq, aamma bowlitalik, 500 kvadratmeteriulluni annerungaatsiarpoq.

2 millionit koruunit kommunip sanaartornermut missingersuutaanit tiguneqarput, skateboardertarfissarlu Nuummi Qinngutsinni Hans Lyngep Atuarfiata eqqaaniissaaq. Urban Greenlandip neriuutigaa aningaasarpasuarnik katersisinnaassallutik, Sisimiuni illup iluani skateboardertarfissamik sanarusukkamik. Taanna 13 millionit koruuninik akeqassaaq, eqqarsaataavorlu tassani illumi ininik nipilersortarfinnik aamma peqassasoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat