Sivso Dorph: Østre Landsretip aalajangiinera iluarinarpoq

Namminersornerullutik Oqartussani kultureqarnermut ilinniartitaanermullu pisortaqarfimmi allaffimmi pisortap 2002-mi soraarsitaanera unioqqutitsinerusoq, Kalaallit Nunaata Eqqartuussiviata siorna maajimi aalajangiinera, Østre Landsret-imit nalilerneqaqqammerpoq, Nunattalu Eqqartuussiviani siorna aalajangiussaq atuuttussanngortinneqarpoq.

Ilinniartitsisut kattuffianni siulittaasup Sivso Dorphip aalajangiineq iluaraa.

Taanna ima oqarpoq:

- Tassa eqqartuussivimmut tunniunnikuuarput, taava 2005-imi siullermik Nunatta Eqqartuussiviani aalajangiiffigineqarnikuuvoq kukkusumik soraarsitaasimasoq. Taamaattumillu ukiuni pingasuni akissarsiaqartinneqartussaasoq, Sivso Dorph oqarpoq, nangillunilu:

- Uagutsinnut iluarinarpoq, pissutigalugu siunissamut tunngaviliisuummat qanoq pisoqaraangat suliffimmilu allannguisoqarniaraangat kattuffimmik paaseqateqarsimanissaq pingaaruteqarmat, Sivso Dorph oqarpoq.

Taamatut aalajangiineq katillugit 1,6 millioni koruuninik naleqarpoq.