Siverthip Nuuk puigunngilaa

Naalakkersuisut suliffissaaleqineq akiorniarlugu aningaasaliisimapput. Nuuk misigisimavoq puigorneqarluni. Tamanna Ineqarnermut Naalakkersuisup Siverth K. Heilmannip atassummeersup akerlilerpaa.

-Nuannaarutigalugu erseqqissaatigissavara, Namminersorlutik Oqartussat piffissami matumanerpiaq inissiat 81-it sanatimmagit. Tamatuma saniatigut Kommuneqarfik Sermersooq Namminersorlutik Oqartussanit aningaaliiffigineqarpoq inissiat attartortittakkat 45-it sanaartorneqarnissaannut. Kiisalu taakku saniatigut inissiat tamatigoortut 48-it Nuummi sanaartorneqarnissaannut atatillugu nunaminertamik atuisinnaanermik Namminersorlutik Oqartussat Kommuneqarfik Sermersuumut noqqaassuteqarput. Ataatsimut isigalugu aningaasaliissutit 200 mio. kr.-init ikinnerunngitsut matumani pineqarput. Tamanna tunngavigalugu erseqqilluinnartumik ilumuunnginnerassavara Nuuk puigorneqarsimanerarlugu Naalakkersuisut pisuutinneqarnerat, Sivert K. Heilmann oqarpoq.

Kommuneqarfik Sermersuumi borgmesterip Asii Chemnitz Narup isumaqarpoq suliffissaaleqineq akiorniarlugu aningaasaliissutit Nuummi suliffissaaleqisut 1000-it missaaniittunut annikippallaartut.

Ineqarnermut Naalakkersuisup Siverth K. Heilmannip erseqqissaatigaa 2009-miit maannamut Namminersorlutik Oqartussat inissianik 768-nik Nuummi sanaartortitsinermi peqataasimammata.

- Taamatuttaaq ilisimavara Naalagaaffik Nuummi paarnaarussivimmik sanatitsiniartoq. Umiarsuarmut imarpik ikaarlugu ingerlaartartunut umiarsualivissamik nutaamik sanaartortoqassaaq aammattaaq Inatsisartut ataatsimiittarfissaannik nutaamik sanaartortitsisoqarnissaanik Inatsisartut pilersaaruteqarput. Sanaartugassat taakku annertoorsuit pingasut 1.000 mio. kr. sinnerlugit naleqassapput, Ineqarnermut Naalakkersuisoq Siverth K. Heilmann naggataatigut erseqqissaavoq nangillunilu.

-Tamanna iluatsissappat Inatsisartuni partiit annertuumik isumaqatigiinnissaat aammalu Kommunit peqataarusussuseqarnissaat pisariaqarpoq, tamanna pisinnaappat aalaakkaasumik patajaatsumillu suliassaqarfik ineriartortinneqarsinnaassaaq, Siverth K. Heilmann oqarpoq.