Siverth K. Heilmann: Suliffissat ataavartut milliardi koruunerpassuillu aqqutissiuuneqarput

Suliffissat ataavartut 700-t tungaanut amerlassusillit aningaasallu 15 milliardi koruunit. Taakkuupput naalakkersuisut ullaaq ataatsimiinnerminni - erngup nukissiorfiliornissamik aluminiumillu aatsitsiviliorfissarsuarmik misissueqqissaartussamik Alcoa-mik atsioqatigiissuteqarnissamik –isumaqatigiissuteqarlutik aqqutissiuussaat.

Inuussutissarsiornermut, Suliffeqarnermut Inuussutissarsiutinullu kiisalu ilinniartitaanermut Naalakkersuisoq, Siverth K. Heilmann nuannaaqaluni oqarpoq, nunatsinni siunissami aningaasarsiornissatsinnut, aamma ataavartunik ukioq naavillugu suliffissanik pilersitsisinnaanermut alloriarnerusoq angisoorujussuaq.

Aluminiuliorfissaq 8,5 milliardi koruunit missaannik aamma erngup nukiliorfissaq 6,5 milliardi koruunit missaannik akeqassangatinneqarput. Katillugit 15 milliardi koruunit. Kiammitaava akilissavai?

- Aningaasarparujussuupput. Kalaallit Nunaannit aningaasaleeqataasoqassaaq – sanaartornermik aallartitsiniartut aningaasartuuteqarnerpaassapput, akivoq.

Naalakkersuisut Alcoamik toqqaanerat peqquteqarpoq Alcoa nunarsuarmi aluminiuliorfinnik ingerlataqareernermigut pilersaarusiornikkut Norsk Hydrominngaanniit siuarsimanerummat.

Naalakkersuisut taamaalillutik amerikamiut aluminiuliornermi ingerlatseqatigiiffiat Alcoa Inc. suleqatigiinnissamik tallimanngorpat arfininngorpalluunniit Joint Committee-p Ilulissani maajip 25-aniit 27-anut 2007-mi ataatsimiinnerani atsioqatigiiffigissavaat.