Siunnersuut: Nunatsinni talittarfiit ulinnerusalernissaanut nalimmassarlik

Kujataani malerujussuit ulinneralu nalinginnaanngitsut ukioq kingulleq pisareerput. DMI-ilu naapertorlugu siunissami assingusumik pisoqaqqinnissaa naatsorsuutigaa.

Taamaammat Atassummiit illoqarfinni nunaqarfinnilu aaqqissuunneqarnissaat siunnersuutigineqarpoq. Pinngortitap nukissuanut talittarfiit illersorneqarsinnaanerussammata.

- Pinngortitaq aqussinnaanngilarput, inatsisiliortutulli pisut allanngorarneranni naleqqussaanissarput avaqqunneqarsinnaanngilaq.

AAMMA ATUARUK Ilisimatooq malerujussuit ulinneralu nalinginnaanngitsut pillugit: Taama pisoqaqqikkumaarpoq

Siverth K. Heilmannip immap tinittarnera ulinnerusalerneralu angallatinut umiarsuarnullu talittarfiit illoqarfinni nunaqarfinnilu qarsunneqartarnerat pinngitsoortinniarlugu, isumannaannerusumik aaqqissuunneqarnissaat, Inatsisartut ukiakkut ataatsimiinnissaannut siunnersuummini taama allappoq, nangillunilu.

- Qarsutsinikkut nioqqutissat, allallu assigisaat isumannaatsumiinnissaat anguniartariaqarpoq.

Novembarip ulluisa 14-ianni 2019-imi naqitsiniisaffik kitaanit anorersuartitsivoq, tamannalu Paamiuni 1 meterimik ulinneruneranik kinguneqarpoq.

Imaq uleqimmat Pilersuisup pisiniarfiata sulisuisa isaariaannut annguppoq.

AAMMA ATUARUK Paamiut nalinginnaanngitsumik ulerujussuaqqasoq

- Aatsaat taama ulissimatigisoq takuara, Pisianiarfimmi sulisoq Rebekka Grim oqaluttuarpoq. 

Paamiuni ulerujussuarnerata kingorna aqanguani Ilulissat eqqaanni anorersuarnera ulerujussuarneranik kinguneqarpoq. 

Tassani illut pingasut inui qimangussortinneqarput. 

Politiit oqarnerat naapertorlugu Ilulissani illut qassiiusut malissuarnit eqqorneqarnerat ulussaarsuartut sakkortutigisumik anoraasuarneranik pissuteqarpoq.

Nunattali qeqqani kujataanilu nalaanneqarsimasut, Siverth K. Heilmannip siunnersuummini kisiisa tunngavileersuutiginngilai.

- Nunatta avannaani iluliarsuit aserornerini, qaqqaniillu ujararujussuit sisoorneratigut tassaarsuartoqarneratigullu, inuit ajunaarnerannik kinguneqartareersoq arajutsinngilarput, Siverth K. Heilmann allappoq.

AAMMA ATUARUK Aningaasaqarnermut naalakkersuisoq: nammaqatigiitta

- Siunnersuutip aningaasartai suli inissivinneqanngillat. Arlaatigut aallartitsissagutta aalangajersimasumik qanoq aningaasartuuteqarfiutigissanersoq paasereerutsigu uterfigeqissinnaavarput, Siverth K. Heilmann taama oqarpoq.

Aningaasaqarnermulli Naalakkersuisup Vittus Qujaukitsup (NQ) coronavirusip nalaani aningaasartuutitalinnik siunnersuuteqartoqarnissaa pinaveersaarittariaqartoq martsip ulluisa 28-anni kaammaattuutigaa.

Siunnersuut Inatsisartut ukiakkut ataatsimiinneranni novembarip ulluisa tallimaanni oqaluuserineqassaaq.