Siverth K. Heilmann nuannaaqaaq
Suliffissat ataavartut 700-t tungaanut amerlassusillit, aningaasallu 15 milliardi koruunit.
Erngup nukissiorfiliornissamik aluminiumillu aatsitsiviliorfissarsuarmik misissueqqissaartussamik, Alcoa-mik, atsioqatigiissuteqarnissamik isumaqatigiissuteqarlutik naalakkersusuisut ullaaq ataatsimiinnerminni aqqutissiuussaat tamakkuupput.
Inuussutissarsiornermut, Suliffeqarnermut Inuussutissarsiutinullu kiisalu Ilinniartitaanermut Naalakkersuisoq, Siverth K. Heilmann oqarpoq:
- Nuannaaqaanga, aamma naalakkersuisut pilluaqqusinerat sulilluartoqarsimaneranik oqaasertalermassuk. Pingaaruteqaqaarmi siunissami aningaasarsiornissatsinnut, aammalu ataavartunik ukioq naavillugu suliffissanik pilersitsisinnaanermut alloriarnerummat angisoorujussuaq, Siverth K. Heilmann oqarpoq.
Pingaarnerpaanerarpaa inuiaqatigiit ajunnginnerpaamik suliffeqarfiit, kattuffiit kommunillu assigiinngitsut suleqatigilluarnissaat.
- Suliffippassuit pilersinnissaannut pinngitsoorani suleqatigiittoqartariaqarpoq, erseqqissaavoq.
Sumi aluminiuliorfiliortoqarnissaa suli nalunarpoq.
- Ajornanngippat kissaatiginartikkaluarpara Sisimiut, Maniitsup imaluunniit Nuup eqqaani sanasoqassanersoq ukioq naatinnagu aalajangerneqassasoq. Pilersaarutilli malissagaanni aappaagu apriilimi nalunarunnaassaaq, naalakkersuisoq oqarpoq, nangillunilu:
- Suliaq inuiaqatigiinnut aningaasarsiornikkut pingaaruteqartorujussuussaaq – aningaasarsiornikkut suliffeqarniarnikkullu.
Aluminiuliorfissaq 8,5 milliardi koruunit missaannik, aamma erngup nukiliorfissaq 6,5 milliardi koruunit missaanik, akeqassangatinneqarput. Katillugit 15 milliardi koruunit. Kiammitaava akilissavai?
- Aningaasarparujussuupput. Kalaallit Nunaannit aningaasaleeqataasoqassaaq – sanaartornermik aallartitsiniartut annerpaamik aningaasartuuteqarnerpaassapput, akivoq.
Naalakkersuisut Alcoamik toqqaanerat peqquteqarpoq Alcoa nunarsuarmi aluminiuliorfinnik ingerlataqareernermigut pilersaarusiornikkut Norsk Hydrominngaanniit siuarsimanerummat. Naalakkersuisut nalilersuinerminni suleqatigiissutigineqarsinnaasut amerlasuut takusinnaaleramikkik.
Siverth K. Heilmannip oqarnermini eqqarsaatigaa, nunaqavissut suliffissualiornerni peqataatinneqarnissaat Alcoa-mik isumaqatigiissuteqarnermikkut qulakkiissagamikku, avatangiisinillu mianerinnilluni Alcoap suliffissualiortarnera ilisimaneqarmat.
Amerikamiullu aluminiuliornermi ingerlatseqatigiiffiat, Alcoa, suleqatigiinnissamik, Joint Committee-p Ilulissani maajip 25-aniit 27-anut 2007-mi ataatsimiinnerani naalakkersuisut taamaalillutik tallimanngorpat arfininngorpalluunniit atsioqatigiiffigissavaat.
Kalaallit Nunaanni aluminiumik aatsitsivimmik ukiumut 340.000 tonsinik tunisassiortussamik pilersitsinissaq misissorneqarniarpoq.
Naatsorsuutigineqarpoq erngup nukinga atorlugu nukissiorfissaq 2010-mi aallartinneqarsinnaassasoq, aatsiterivillu 2012-mi sanaartorneqarluni aallartinneqarsinnaassasoq.
Pilersaarutit malillugit ingerlasoqassappat aluminiumik aatsiteriviup tunisassiornini 2014-ip naajartulernerani aallartissinnaassavaa.
