Siutinik noqqoruunnialeqaat

Kalaallit timersortartut peqataaffigissamaalerpaat Eskimo-Indian Olympics Alaskami Fairbanks-imi pisussaq. Unammeriaatsit alutornarluinnartut peqataaffigissavaat unamminerit pingasunngorneq juulip 20-ianiit arfininngorneq juulip 23-iata tungaanut ingerlanneqalerpata.

Kalaallit unammeqataaffigissavaat Arctic Sports-imi aamma Dene Games-imi unammeriaatsit Arctic Winter Gamesimi ilisimaneqareersut. Unammissutigineqartussat ilagaat pissilluni unamminerit soorlu one foot high kick aamma Alaskan high kick.

Unammeriaatsilli aamma ilaqarput kalaallinut takornartaasunik.

Tamakku ilagaat siutinik noqqoruunneq ear pull-imik taagorneqartoq. Allunaasaaraq ningartaleriarlugu siutinut ikkullugu noqqoruuttarput unammisamit ningartamik katatsitsisoq ajugaasarluni.

Nukiit atorlugit aamma unammisoqartarpoq unammeriaatsillu ilagaat angutinik inersimasuni sisamanik ataatsikkut kivitsineq pisuffillu takineqqusaallugu.

Kalaallit isumalluarfigaat Emil Geisler Ilulissaneersoq siorna Arctic Winter Gamesimi  stick pull-imi aamma polepush-imi pissartanngortoq. Pissanngatigineqarpoq Eskimo-Indian Olympics-imi rekordi tassalu 53 meterimut pisuneq angusinnaajumaarneraa.

- Neriuppugut peqataatitassagut pikkorinnerit qulit akornanniittarumaartut unammeriaatsini assigiinngitsuni, angalasussat ningiuat Helga Nielsen KNR-imut oqarpoq.

Unammeriaatsit alutornartut ilagaat mattattullaqqinneqqusaanneq pisortatigoortumik unammersuarnerit avataatigut pisussaq. Tassani piffissami aalajangersimasumi kina mattattorsinnaanerunersoq unammissutigineqassaaq.

Nunarput sinnerlugu unammiartortussat tassaapput Minik aamma Pilo Rasmussen, Emil Geisler aamma Helga Nielsen.