VIDEO Siusissukkut iliuuseqarneq atornerluisunut neriuuteqalersitsisoq

Ilaqutariit inooqataanikkut ajornartorsiortut atornerluiunnaarnissaannik, atornerluinerullu kingunerisaanik nakuusernermik kinguaassiutitigullu ajornartorsiuteqartut, ikiussagaanni, siusissukkut iliuuseqarnissaq pingaartuusoq oqartussaasut ilisimatuullu naqissuserpaat.

Allattoq Pipaluk Høegh, Camilla Dam

apriilip 05-at 2016 11:25

Kisitsisitigut paasissutissat naapertorlugit Nunatsinni suli ajornartorsiuteqangaatsiarpugut, siunissamulli neriuutissaqarpoq.

- Siusissukkut iliuuseqartoqartarnera iluaqutaasoq ilimagilluinnarpara, aamma suliniutit allat ingerlareersut peqatigisaannik siunissami iluaqutaajartuinnassasoraara.

- Siunissamili ungasinnerusumi malunniutaat aatsaat takusinnaalissavagut, Syddansk Universitetip Innuttaasut peqqissusaannik misissuisoqarfiani ilisimatusartoq, Christina Viskum Lytken Larsen, KNR-imut taama oqarpoq.

Aamma atuaruk Hashitortarneq bingortarnerlu ajornarsiutaajartuinnalersut

Ivaaq Nuummiittoq ilaqutariinnut meerartalinnut katsorsaaviutigaluni najugaqarfiuvoq ilaqutariinnit mikisunik meerartalinnit qulingiluanit najugaqarfigineqartoq.

Tassani najugaqartut ilaat, Angerla Kristensen angutaataalu Angutimmarik, ikiaroornartumik hashimik atornerluinertik unitsillugu siunissamut neriuuteqarlutillu takorluugaqalersimasut ilaqutariinnik ilitsersuisartumit Haldora Fleischerimit oqaloqatigiinnerit, siunnersuinerit katsorsaanerillu aqqutigalugit ikiorneqarput.

- Siumut aallariarnikuuvugut atuisuujunnaareerlutalu.

Aamma atuaruk Innuttaasut peqqissusaat pillugu nalunaarusiaq saqqummerpoq

- Neriuppunga siuarujussuarsimassallunga, atuisuunngitsutut inuuneqassallunga, ilinniartunngornissaralu kissaatigaara, Angerla Kristensen taama oqarpoq.

Ivaami ukiut marluk tikillugit najugaqartoqarsinnaavoq.