Aalisarnermut inatsit: Siunnersuut qularnerulersitsisinnaasunik imaqartoq

Aalisagartassiissutinik piginnittuunermik naleqqussaanikkut tamanna anguneqassaaq.

Tassalu inatsisissatut siunnersuummi pingaarnernut ilaapput pisassiissutinit nammineq pigisanik nalunaarsueriaaseqarnissap nutaap atorneqalernissaa, pisassiissutinit toqqaannanngitsumik piginneqataaffigisat ilanngullugit naatsorsorneqartassallutik. Oqaaseqaatit naapertorlugit nalunaarsueriaatsip nutaap suliffeqarfiit ilaat pisassiissutinik nammineq pigisaminnik piginneqatigiiffimmiluunniit piginneqataassutinik pinngitsaaliissummik tunisariaqassavaat.

AAMMA ATUARUK Aalisarnermut inatsisissap peqqissaarullugu suliarineqarnissaa GE-p neriuutigaa

Tamanna eqqartuussivitsigut sulianngorsinnaasoq, Namminersorlutillu Oqartussat taamaalillutik akiliisussanngortinneqassutigisinnaagaat nassuiaammi nassuerutigineqarpoq. Namminersorlutik Oqartussat eqqartuussivimmi suliami taarseeqquneqarluni ajorsarpat, Nunatta karsianut tamanna akisusinnaasoq erseqqissaatigineqarpoq.

Taakku saniatigut nunatta kitaani raajanut pisassiissutit allanngortinneqassapput taamaalilluni sinerissap qanittuani raajartassat pisassat tamarmik  43 procentianniit 50 procentinngussasut raajarniarsinnaanermullu akuersissutit maanna piffissamik killiligaanngitsuusut, ukiut tallimat sioqullugit atorunnaarsinneqarsinnaasunngortinneqassapput. Allannguut taanna aamma piginneqatigiit namminersortut taarsiiffigineqarnissamik piumasaqarnerannik kinguneqarsinnaavoq.

Atorfillit inatsississatut siunnersuutip oqaasertaani allapput, siunnersuut inuussutissarsiortut nalornilissutigisinnaasaaaannik arlalinnik imaqartoq:

- Taamaalilluni nalorninerulernerup tamassuma aalisarnermi angallatinut nutaanut naammassisaqarnerusinnaasunullu aningaasaliinissaq pilerinannginnerulersissavaa, atorfillit allapput.

Aalisarnermut inatsit nutaaq kalaallinut inuiaqatigiinnut 300 millionit koruuninik ukiumut naleqarsinnaasoq nassuaammi allassimavoq.

Inatsisissatut siunnersuummut oqaaseqaatit tamarmik uani atuakkit.