Siunnersuut itigartinneqarpoq
Atassut sinnerlugu Inatsisartuni ilaasortat siunnersuuteqarput Inatsisartunut qinigaasinnaatitaanermut ataatsimiititaliami ilaasortat tamarmik inatsisilerinermut tunngasunik ilinniagaqarsimasuusariaqartut. Atassutikkut siunnersuutaat Inatsisartuni amerlanerussuteqartunit akuersaarneqanngilaq. Demokraatit siulittaasuat Inatsisartunilu ilaasortaq Per Berthelsen akerliusoq ima oqarpoq:
-Ataatsimiititaliap inatsisilerituutut ilinniarsimasuinnarnik ilaasortaqarnissaa isumaqatiginngilara, uanga isumaqarama inatsisilerituut Ataatsimiititalimi ilaasortaasut naammammata. Ataatsimiititaliap siulittaasua inatsisilerituujuvoq suliassallu qaqinneqartut tamavimmik inatsisilerituunit suliarineqartarput ataatsimiinnernilu inatsisilerituut marluk siunnersortitut najuuttarput. Taamaattumik isumaqarpunga naammattorsuarmik ilaareersut.
Inatsisartunut qinersiviup ataasiusup arlalinngorteqqinneqarnissaanik Inatsisartuni ilaasortaq Inuit Ataqatigiinneersoq Kuupik Kleist siunersuuteqarnerminik aamma tunuartitsitsivoq.
